سی اے اے کی اجازت کے باوجود پی آئی اے کےاندرون ملک مسافر کھانے کی سہولت سے محروم

سول ایوی ایشن اتھارٹی کی اجازت کے باوجود قومی ائیر لائن پی آئی اے کی جانب سے اندرون ملک پروازوں میں مسافروں کو ناشتہ اور کھانا فراہم نہیں کیا جارہا۔

باغی ٹی وی : ذرائع کے مطابق سول ایوی ایشن اتھارٹی نے یکم اکتوبر سے اندرون ملک پروازوں میں کھانا فراہم کرنے کی اجازت دے رکھی ہے پی آئی اے کی اسلام آباد پرواز پی کے 300 میں مسافروں کو ناشتہ نہیں دیا گیا، دوران پرواز مسافروں کو صرف ایک بوتل پانی ان کی نشست پر رکھی ملی، اسلام آباد کا یک طرفہ کرایہ 15 ہزار روپے تک لیا گیا اور کھانا نہیں دیاگیا۔

سول ایوی ایشن اتھارٹی کی اجازت کے باوجود پروازوں میں ناشتہ اور کھانا نہ دینے پر مسافروں نے ناراضی کااظہار کیا۔

سول ایوی ایشن اتھارٹی کے مطابق پروازوں میں کھانا فراہم کرنے کا فیصلہ کورونا وائرس کیس میں کمی کے بعد کیا گیا ہے۔

پاکستان میں کورونا وائرس سے مزید 46 افراد جاں بحق ہوگئے-

نیشنل کمانڈ اینڈ آپریشن سینٹر (این سی او سی) کے مطابق گزشتہ 24 گھنٹوں کے دوران ملک بھر میں 51ہزار343کورونا ٹیسٹ کیے گئے مزید 1 ہزار453 کورونا کیسز رپورٹ ہوئے۔

این سی او سی کے مطابق گزشتہ چوبیس گھنٹوں میں ملک میں کورونا کیسز کی مجموعی تعداد 12 لاکھ 55 ہزار321 جبکہ مجموعی اموات کی تعداد28ہزار 32 ہو گئی ہے اور مثبت کیسز کی شرح 2.82 فیصد رہی۔

سندھ میں کورونا کے کیسز کی تعداد 4 لاکھ 61ہزار869،خیبر پختونخوا میں ایک لاکھ 75 ہزار212، پنجاب میں 4 لاکھ 34 ہزار647، اسلام آباد میں ایک لاکھ 5 ہزار930، بلوچستان میں 33 ہزار26، آزاد کشمیر میں 34 ہزار299 اور گلگت بلتستان میں 10 ہزار338 ہو گئی ہے۔

کورونا کے سبب سب سے زیادہ اموات پنجاب میں ہوئی ہیں جہاں 12 ہزار 744 افراد جان کی بازی ہار چکے ہیں جبکہ سندھ میں 7 ہزار471، خیبرپختونخوا 5 ہزار613، اسلام آباد 930، گلگت بلتستان 186، بلوچستان میں 349 اور آزاد کشمیر میں 739 افراد جان کی بازی ہار چکے ہیں-