کراچی: سیکیورٹی ڈویژن کے 500 پولیس اہلکاروں پرمشتمل اینٹی رائٹ فورس تشکیل دے دی گئی-
باغی ٹی وی : تفصیلات کے مطابق ایڈیشنل آئی جی کراچی عمران یعقوب منہاس اور ڈی آئی جی سیکیورٹی اینڈ ایمرجنسی سروسز ڈویژن مقصود احمد کی ہدایات پر 500 پولیس اہلکاروں پر مشتمل اینٹی رائٹ فورس تشکیل دے دی گئی۔
ترجمان ڈی آئی جی سیکیورٹی اینڈ ایمرجنسی سروسز ڈویژن کے مطابق فورس کے قیام کا مقصد شہر میں امن و امان کی صورتحال سے متعلق کسی بھی صورت حال سے نمٹنا ہے۔
فورس کی تشکیل کا فیصلہ ایڈیشنل آئی جی کراچی کی زیر صدارت ایک اجلاس میں کیا گیاتھا۔ یہ فورس ہنگامی حالات میں مقامی پولیس اور دیگرقانون نافذ کرنے والے اداروں کی مدد کرے گی۔
ڈی آئی جی سیکیورٹی مقصود احمد نے اپنے خیالات کا اظہار کرتے ہوئے کہا کہ اینٹی رائٹ فورس جو کہ ایس ایس یو کمانڈوزاور سیکیورٹی ڈویژن کے اہلکاروں پر مشتمل ہے جدید ترین اینٹی رائٹ سامان سے لیس ہے اوراہلکار کسی بھی ہنگامی صورتحال کا جواب دینے کے لیے چوبیس گھنٹے الرٹ رہیں گے۔
اس موقع پر کمانڈنٹ ایس ایس یو ذیشان شفیق صدیقی نے کہا کہ فورس شہر میں شرپسندوں کے مذموم عزائم کو ناکام بنانے کی بھرپور صلاحیت رکھتی ہے۔فورس کے اہلکار تربیت یافتہ اور جدید ترین آلات سے لیس ہیں۔
