واشنگٹن:امریکی ٹی وی نے پاکستانی سفیر کے حوالے سے رپورٹ کیا ہےکہ مقبوضہ وادی کو بھارت نے دنیا کی سب سے بڑی جیل میںتبدیل کردیا ہے. امریکا میں تعینات پاکستانی سفیر اسد مجید نے امریکی ٹی وی کو انٹرویو دیتے ہوئے کہاپاکستان کوئی ایسا اقدام نہیں اٹھائے گا جو امن کیلئے خطرہ بنے، امریکا کشمیر کو متنازعہ علاقہ تسلیم کرتا ہے اور وادی کی خود مختاری ختم کرنے پر ٹھوس بیان آنا چاہیے۔
امریکی ٹی وی سے گفتگوکرتے ہوئے ان کا مزید کہنا تھا کہ مقبوضہ کشمیر میں مکمل طور پر لاک ڈاؤن ہے اور بھارت نے مقبوضہ وادی کو دنیا کی سب سے بڑی جیل بنا دیا۔ امریکا سمیت عالمی برادری کشمیر کو متنازعہ تسلیم کرتی ہے، امریکا بھارت کو موجودہ اقدامات واپس لینے کا کہہ سکتا ہے اور مسئلہ کشمیر کے حل میں امریکا اہم کردار ادا کرسکتا ہے۔
اپنی گفتگو میں اسد مجید نے حقائق پر سے پردہ اٹھاتے ہوئے کہا کہ بھارت نے یکطرفہ طور پر مقبوضہ کشمیر کی حیثیت کو تبدیل کیا جبکہ کشمیر کی 12 ملین آبادی پر 9 لاکھ بھارتی فوج تعینات ہے۔ پاکستان کا مقبوضہ کشمیر سے متعلق موقف اصولی ہے، بھارت نے امریکی صدر ٹرمپ کی پیشکش کو قبول نہیں کیا اور امید ہے دوست ممالک کشیدگی کم کرانے میں کردار ادا کریں گے۔وزیراعظم نے دورہ امریکا میں امن کی کوششوں پر زور دیا اور بھارت کے حالیہ اقدامات پر تشویش ہے۔
