پی ٹی آئی چیف آرگنائزر سیف اللہ نیازی نے گورنمنٹ آف پاکستان سے مقبوضہ کشمیر کے حوالے سے بڑا مطالبہ کر دیا
حکمران جماعت پی ٹی آئی کی چیف آرگنائزر سیف اللہ نیازی نے اسلام آباد میں ریلی سے خطاب کرتے ہوئے کہا ہے کہ انہیں بھارتی سیکولر لوگوں سے امید نہیں کہ وہ کشمیریوں کو انصاف فراہم کرنے کے لیے کوشش کریں گے لیکن وہ انہیں ایک موقع دینا چاہتے ہیں۔ اب محبوبہ مفتی اور عمر عبداللہ جیسے لوگ حکومت کے فیصلے کو منسوخ کروانے کے لیے بھارتی سپریم کورٹ سے رجوع کر سکتے ہیں۔
سیف اللہ نیازی نے کہا کہ اگر بھارت نواز کشمیری سیاست دان اور سیکولر بھارتی مقبوضہ کشمیر کے عوام کو انصاف نہ دلا سکے تو پھر پاکستانی عوام آزاد کشمیر اسمبلی اور پاکستانی پارلیمنٹ سے جہاد یا کشمیر کی آزاد ی کے لیے جنگ کا مطالبہ کرنے میں حق بجانب ہوں گے ۔
پی ٹی آئی رہنما نے ان خیالات کا اظہار ڈی چوک پر کشمیریوں سے اظہار یکجہتی کے لیے نکالی گئی ریلی سے خطاب کرتے ہوئے کیا۔
انہوں نے کہاکہ جنگ وسائل یا ہتھیاروں سے نہیں لڑی جاتی بلکہ ایمان کی طاقت سے لڑی جاتی ہے۔ کشمیر کا مستقبل اقوام متحدہ کی سلامتی کونسل کی قراردادوں پر نہیں چھوڑا جاسکتا۔