وزیر اطلاعات مریم اورنگزیب نے گوجرانولہ سے ایم پی اے بلال تارڑ کے ڈیرے پر پی ٹی آئی کی طرف سے فائرنگ کی شدید مذمت کی ہے مریم اورنگزیب کا کہنا ہے کہ بلال تارڑ پر قاتلانہ حملہ عمران صاحب کے حکم پر کیاگیا اللہ تعالیٰ کا شکر ہے کہ بلال تارڑ کی جان محفوظ رہی.
وفاقی وزیر اطلاعات کا کہنا تھا کہ معیشت کی جان لینے والے اب سیاسی مخالفین کی جان لینے پر اتر آئے ہیں،اپنے لئے وزیراعظم کی سکیورٹی کی بھیک مانگنے والے عمران صاحب دوسروں کی جان لینے کے درپے ہیں،اسلام آباد کو آگ لگانے والوں کے دل سیاسی انتقام کی آگ میں جل رہے ہیں ،گالیاں دینے والے اب گولیاں چلانے پر اتر آئے ہیں،
مریم اورنگزیب کا مزید کہنا تھا کہ عمران صاحب نے فسادی مارچ میں عبرت ناک رسوائی سمیٹنے کے بعد دہشت گردی کی راہ اختیار کر لی ہے،معیشت اور عوام کے خلاف معاشی دہشت گردی کرنے والوں کی فسادی سیاست عوام نے دفن کر دی ہے ،انہوں نے کہا کہ پارٹی بلال تارڑ اور ان کے اہل خانہ کے ساتھ یک جہتی کا اظہار کرتے ہیں .مریم اورنگزیب نے نے کہا کہ پولیس دہشت گردوں کو گرفتار کرے اور قانون کے کٹہرے میں کھڑا کرے ،عمران صاحب سیاسی مخالفین کی جان لینے کی منفی سوچ چھوڑیں، ملک اور عوام کے خلاف اپنے جرائم پر اللہ تعالیٰ سے معافی مانگیں.
یاد رہے کہ مسلم لیگ ن کے رہنما اورگوجرانوالہ سے رکن پنجاب اسمبلی بلال تارڑ کے ڈیرے پر گذشتہ رات پی ٹی آئی کے ارکان کی جانب سے حملہ کیا ھیا اور فائرنگ کی گئی تاہم اس حملے میں رکن پنجاب اسمبلی بلال تارڑ محفوظ رہے،پی ٹی آئی کی جانب سے بلال تارڑ کے کمرے پر فائرنگ کی گئی، مقامی پولیس واقعہ کی مذید تفتیش کر رہی ہے
Leave a reply
