![](https://baaghitv.com/wp-content/uploads/2022/06/FVOkj8NWIAU3yds.jpg)
تہران :وزیر خارجہ بلاول بھٹو زرداری کی ایرانی صدر ابراہیم ریئسی سے ملاقات،اطلاعات کے مطابق پاکستان کے وزیرخارجہ بلاول بھٹوزرداری اس وقت ایران کے دورے پرہیں اوران کی وزیرخارجہ کے بعد اب ایرانی صدر سے ملاقات بھی ہوچکی ہے جس میںدوطرف تعلقات اوراسلامی برادرانہ رشتے پرکھل کربات ہوئی ہے
یاد رہے کہ اس سے پہلے وزیرخارجہ بلاول بھٹو نے تہران میں ایرانی ہم منصب کے ہمراہ پریس کانفرنس کرتے ہوئے کہا ہے کہ ایرانی وزیرخارجہ کے ساتھ ملاقات خوشگوار ماحول میں ہوئی، ملاقات میں دوطرفہ تجارت اور خطے کی صورتحال پر تبادلہ خیال کیا گیا۔
انہوں نے کہا کہ ایرانی وزیرخارجہ کے ساتھ تجارت ،زائرین کو سہولیات کی فراہمی پر بات ہوئی، باہمی مشاورت سے تعلقات میں مزید بہتری آئے گی، قیدیوں کے تبادلے پر ایرانی ہم منصب سے بات ہوئی۔
بلاول بھٹو نے کہا کہ ایرانی ہم منصب کو پاکستان آنے کی دعوت دیتا ہوں، پاکستان اور ایران افغانستان مہاجرین کو پنا دیے ہوئے ہیں، ایران بھی افغانستان میں امن کا خواہاں ہے۔وزیرخارجہ بلاول بھٹو نے کہا کہ بھارت مقبوضہ کشمیر میں بھی انسانی حقوق کی خلاف ورزیوں میں ملوث ہے۔
مشترکہ پریس کانفرنس سے خطاب کرتے ہوئے ایران کے وزیر خارجہ حسین امیر عبد اللہیان نے بھی کہا کہ ایران ہمیشہ مذاکرات کا حامی رہا ہے اور اس کا خیال ہے کہ سفارتکاری سے حتمی سمجھوتہ حاصل کیا جا سکتا ہے۔ انہوں نے کہا کہ ویانا مذاکرات کا عمل آگے بڑھانے کے لئے ایران نے اہم اقدامات کئے یہاں تک کہ ایران اور گروپ چار جمع ایک کے درمیان مذاکرات اور ایران اور امریکہ کے درمیان پیغامات کا تبادلہ ہوا اور ایران نے اس بات کو ثابت کر دیا کہ وہ ایک اچھے اور پائیدار و مستحکم سمجھوتے کے حصول کے لئے مذاکرات کا قائل ہے۔
انہوں نے علاقے کے مسائل کا بھی ذکر کیا اور کہا کہ تہران، افغانستان میں ایک وسیع البنیاد حکومت کی تشکیل پر زور دیتا رہا ہے تاکہ اس ملک کے مسائل حل ہو سکیں۔
ایران کے وزیر خارجہ نے کہا کہ تہران پورے فلسطین میں ایک ایسی متحدہ حکومت کی تشکیل کا خواہاں ہے کہ جس کا دارالحکومت بیت المقدس بنے۔