![](https://baaghitv.com/wp-content/uploads/2022/07/Capture.jpg)
راولپنڈی :چیئرمین جوائنٹ چیفس آف سٹاف کمیٹی جنرل ندیم رضا سے ترک جنرل موسیٰ کی ملاقات،اطلاعات کے مطابق آج ترک جنرل موسیٰ نے اپنے دورہ پاکستان کے دوران دوسری بڑی فوجی شخصیت سے ملاقات کی ہے ، معلوم ہوا ہے کہ ترک جنرل نے جوائنٹ سٹاف ہیڈ کوارٹرز راولپنڈی میں چیئرمین جوائنٹ چیفس آف سٹاف کمیٹی جنرل ندیم رضا سے ملاقات کی۔
ذرائع کے مطابق اس ملاقات میں دونوں رہنماوں کے درمیان سلامتی اور علاقائی امور کے علاوہ افغانستان میں تازہ ترین پیش رفت کے علاوہ دوطرفہ فوجی تعلقات اور تعاون کی سطح اور دائرہ کار کو بڑھانے سے متعلق امور پر تبادلہ خیال کیا گیا۔ دونوں فریقوں نے عزم کا اعادہ کیا۔ کہ ‘ہر موسم’ دوست ہونے کے ناطے، پاکستان اور ترکی گہرے اسٹریٹجک تعلقات قائم کرتے رہیں گے۔
ترک اورپاکستانی فوجی قیادت نے اس بات پر اتفاق کیا کہ دونوں ممالک دوستانہ تعلقات اور بھائی چارے کے گہرے جذبے کی عظیم تاریخ رکھتے ہیں جو پائیدار شراکت داری میں تبدیل ہو رہی ہے، چیئرمین جوائنٹ چیفس آف سٹاف کمیٹی جنرل ندیم رضا نےکہا کہ قریبی فوجی اور سٹریٹجک تعاون کے حصول میں دونوں ممالک تمام قومی اور بین الاقوامی مسائل پر مشترکہ نظریات رکھتے ہیں۔
معزز مہمان نے پاکستان کی مسلح افواج کی اعلیٰ پیشہ ورانہ مہارت کو سراہا اور دہشت گردی کے خلاف جنگ میں ان کی قربانیوں کا اعتراف کیا۔چیئرمین جوائنٹ چیفس آف سٹاف کمیٹی جنرل ندیم رضا نےدہشت گردی کے خلاف جنگ میں پاکستان ڈیفنس فورسز کی کامیابیوں، قربانیوں اور علاقائی امن و استحکام کے لیے کردار کو تسلیم کرنے پر معزز مہمان کا شکریہ ادا کیا۔
یاد رہے کہ اس سے پہلے آرمی چیف جنرل قمر جاوید باجوہ سے ترک بری فوج کے کمانڈر نے ملاقات کی، ملاقات میں باہمی دلچسپی اور پیشہ ورانہ امور پر تبادلہ خیال کیا گیا، ملاقات میں دفاعی سیکیورٹی تعاون کو مزید فروغ دینے کے امو ر بھی زیر غور آئے۔
اس موقع پر آرمی چیف نےکہا کہ پاکستان ترکی کے ساتھ تعلقات کو خصوصی اہمیت دیتا ہے، دونوں ممالک کے درمیان تاریخی، ثقافتی اور مذہبی حوالوں سے قریبی تعلقات ہیں۔آئی ایس پی آر کے مطابق ملاقات میں دونوں جانب سے انسداد دہشت گردی اور تربیتی امور پر رابطے مزید بڑھانے اتفاق کیا گیا۔