لاہور : پنجاب میں مقدمات کی درست اور بروقت تفتیش کو یقینی بنانے کے لیے تمام پولیس لائنز میں ٹریننگ سکول بنانے کا حکم،اطلاعات کے مطابق آئی جی پنجاب کیپٹن (ر) عارف نواز کا کہنا ہے کہ ٹریننگ سکولز میں لاہور سمیت پنجاب بھر کے انویسٹی گیشن افسران کو جدید تقاضوں کے مطابق تربیت دی جائے گی۔
آئی جی پنجاب کیپٹن (ر) عارف نواز نے تفتیشی نظام کو جدید تقاضوں کے مطابق ڈھالنے کیلئے اہم فیصلہ کیا ہے، آئی جی پنجاب کا کہنا ہے کہ سکولز کیلئے گرانٹس مانگنے کی بجائے موجودہ وسائل کو استعمال کرتے ہوئے ٹریننگ سکولز کیلئے کمرے مختص کئے جائیں گے۔رواں ماہ کے دوران ٹریننگ سکولز کو آپریشنل کرکے رپورٹ آئی جی پنجاب کو بھجوانے کے احکامات جاری کردئیے گئے ہیں۔
باغی ٹی وی ذرائع کے مطابق آئی جی پنجاب نے کہا ہے کہ ٹریننگ سکولز میں نئے بھرتی ہونے والے جوانوں اور تفتیشی افسران کو روزانہ کی بنیاد پر پولیس کے لیگل سیل کے ماہر افسران لیکچر دیں گے جبکہ پراسیکیوشن، ماہرقانون کے خصوصی لیکچرز کا اہتمام کیا جائے گا۔ ٹریننگ سکولز کے قیام کا فیصلہ تفتیشی نظام میں موجود خامیاں دور کرنے کیلئے کیا گیا ہے۔
