جامشورو:جامشورو میں پڑھائی مکمل کرنے کا شوق جان لیوا ثابت ہوا، شوہر نے پڑھائی سے روکنے کے لیے بیوی کو بیدردی سے قتل کر دیا۔
ایس ایس پی جامشورو جاوید بلوچ نے جیو نیوز کو بتایا کہ 26 ستمبرکو نوری آباد کے گاؤں غلام جاکھرو سے نامعلوم خاتون کی لاش ملی تھی جس کی کچھ دن بعد ماجدہ عباسی کے نام سے شناخت ہوئی جو سندھ یونیورسٹی کے شعبہ آرٹ اینڈ ڈیزائن میں فائنل ایئر کی طالبہ تھی۔
پولیس کے مطابق تحقیقات کے دوران خاتون کے شوہر کو گرفتارکیا گیا جس نے پولیس کو بتایا کہ ماجدہ اور وہ ایک ہی کلاس میں پڑھتے تھے اور دو سال قبل پسند کی شادی کی، دونوں کا ایک 7 ماہ کا بچہ بھی ہے، شادی کے بعد ماجدہ فائنل ایئر مکمل کرنا چاہتی تھی،لیکن معاشی تنگی کے باعث اسے پڑھنے سے روک دیا، جس پرماجدہ ناراض ہو کر اپنےگھر (میکے) چلی گئی جسے بعد میں منا کر لے آیا لیکن ماجدہ پڑھائی سے روکنے کی صورت میں طلاق لینے کا مطالبہ کر رہی تھی۔
ملزم نے بتایا کہ وہ 22 ستمبر کو اپنی بیوی کوکراچی گھمانےکا بہانہ بنا کر یونیورسٹی سے موٹر سائیکل پر لےکر نکلا اور نوری آباد کےگوٹھ غلام جاکھروکے قریب پہاڑ سے ماجدہ کو دھکا دیا، اس کے بعد زخمی ماجدہ کے سر پر بھاری پتھر مار کر قتل کر دیا۔
