رانا ثناءاللہ کو عابد شیر علی کی انتخابی مہم چلانے پر آج ہی طلب کرلیا گیا

رانا ثناءاللہ کو عابد شیر علی کی انتخابی مہم چلانے پر آج ہی طلب کرلیا گیا ہے

ڈسٹرکٹ مانیٹرنگ آفیسرفیصل آباد نے ضابطہ اخلاق کی خلاف ورزی پر رانا ثناء اللہ کو نوٹس جاری کردیا۔ نوٹس میں رانا ثنا اللہ کو آج وضاحت کیلئے پیش ہونے کا کہا گیا ہے۔ رانا ثنا اللہ کو گھر گھر جاکر عابد شیر علی کی انتخابی مہم چلانے پر طلب کیا گیا ہے۔

ڈسٹرکٹ ریٹرننگ آفیسر نے ہدایات جاری کی ہیں کہ پبلک آفس ہولڈرز کو فوری طور پر انتخابی حلقے کی حدود سے باہر نکالا جائے۔ ڈسٹرکٹ ریٹرننگ آفیسر کا کہنا ہے کہ انتخابی عمل کے مکمل ہونے تک کسی پبلک آفس ہولڈر کو حلقے میں داخل ہونے کی اجازت نہیں. اگر کسی سرکاری ملازم نے پبلک آفس ہولڈرز کی حلقے میں داخل ہونے میں مدد کی تو انضباطی کارروائی کی جائے گی.

واضح رہے کہ آج قومی اسمبلی کے 8 اور پنجاب اسمبلی کے 3 حلقوں میں ضمنی انتخابات ہو رہے ہیں۔ عابد شیر علی این اے108 فیصل آباد سے پی ٹی آئی کے امیدوار عمران خان کے خلاف الیکشن لڑ رہے ہیں۔ یاد رہے کہ اس سے قبل بھی الیکشن کمیشن نے این اے 108 فیصل آباد ضمنی الیکشن میں ضابطہ اخلاق کی خلاف ورزی پر رانا ثناء اللّٰہ کو 6 ستمبر کو نوٹس جاری کیا تھا.

ترجمان الیکشن کمیشن کے مطابق این اے 108 فیصل آباد میں ضمنی انتخابات کے ضابطہ اخلاق کی خلاف ورزی پر کارروائی کی گئی ہے۔ ترجمان کے مطابق ڈسٹرکٹ مانیٹرنگ آفیسر فیصل آباد نے وزیر داخلہ رانا ثناء اللّٰہ کو نوٹس جاری کیا تھا کیونکہ رانا ثناء ن لیگی امیدوار عابد شیر علی کی گھر گھر جاکر انتخابی مہم چلا رہے تھے۔ ترجمان الیکشن کمیشن کے مطابق ڈسٹرکٹ مانیٹرنگ آفیسر نے تحریری وضاحت کےلیے رانا ثناء اللّٰہ کو 7 ستمبر کو بھی طلب کیا تھا.