![صحت کی معیاری سہولتوں کی فراہمی کیلئے 15ارب روپے کے منصوبوں پرکام شروع](https://baaghitv.com/wp-content/uploads/2022/12/CM-Punjab-2.jpg)
صحت کی معیاری سہولتوں کی فراہمی کیلئے 15ارب روپے سے زائد کے منصوبوں پر کام شروع
وزیراعلیٰ پنجاب چودھری پرویز الٰہی کی ہدایت پر صوبے میں صحت کی معیاری سہولتوں کی فراہمی کیلئے انقلابی منصوبوں پر کام شروع کر دیا گیا ہے اور ہیلتھ کیئر کی معیاری سہولتیں فراہم کرنے کیلئے متعدد منصوبوں کیلئے مجموعی طور پر 26 ارب روپے کے ریکارڈ فنڈز فراہم کئے گئے ہیں۔ وزیراعلیٰ چودھری پرویز الٰہی نے 15 ارب روپے سے زائد کے منصوبوں کا آج آغاز کیا۔وزیراعلیٰ آفس میں ہیلتھ پراجیکٹس کے آغاز کی تقریب منعقد ہوئی۔ وزیراعلیٰ نے متعدد منصوبوں کا افتتاح کیا اور سنگ بنیاد رکھا۔
وزیراعلیٰ چودھری پرویز الٰہی نے کہا کہ صحت کی سہولتوں کو بہتر بنانے کیلئے 26ارب روپے کے فنڈز کی فراہمی ایک ریکارڈ ہے۔نشتر میڈیکل یونیورسٹی ملتان میں ایک ارب 20 کروڑ روپے سے سائبر نائف مشین فراہم کی جا رہی ہے۔سوا ارب سے الائیڈ ہسپتال فیصل آباد میں لینئر ایکسلریٹر مشین سے کینسر کے مریضوں کا علاج کیا جائے گا۔ ایک ارب 30 کروڑ روپے کی لاگت سے عزیز بھٹی شہید ٹیچنگ ہسپتال گجرات میں بھی کینسر کے مریضوں کیلئے لینئر ایکسلریٹر مشین نصب کی جائے گی۔انہوں نے کہا کہ پنجاب میں کارڈیالوجی ہسپتالوں میں جدید مشینری کی فراہمی کے ساتھ ساتھ نیا کارڈیالوجی ہسپتال بنائیں گے۔ انسٹی ٹیوٹ آف کارڈیالوجی وزیر آبادکو 5 ارب روپے سے مزید 200 بیڈز اپ گریڈ کیا جا رہا ہے۔ دل کے مریضوں کیلئے گیما کیمرہ الیکٹرو فزیالوجی ایکوپمنٹ اور ٹرازٹ ٹائم فلومیٹر فراہم کی جا رہی ہے۔انسٹی ٹیوٹ آف کارڈیالوجی وزیر آباد کی توسیع کے لئے 385ملین روپے کی لاگت سے زمین حاصل کی گئی ہے۔ انہوں نے کہا کہ پی آئی سی لاہور میں مریضوں کو ادویات کی فراہمی کیلئے دواخانہ کا قیام عمل میں لایا جا رہا ہے۔انسٹی ٹیوٹ آف کارڈیالوجی لاہور میں 50 کروڑ سے سی ٹی انجیو گرافی مشین اور گیما کیمرہ(تھیلیم سکین) نصب کی جا رہی ہے۔ سرگودھا میں 6ارب روپے کی لاگت سے چودھری انور علی چیمہ انسٹیٹیوٹ آف کارڈیالوجی کا قیام عمل میں لایا جا رہا ہے۔ چودھری پرویز الٰہی انسٹی ٹیوٹ آف کارڈیالوجی بہاولپور میں 700ملین روپے سے سی ٹی انجیوگرافی مشین اور گیما کیمرہ (تھیلیم سکین) کی فراہم کی جا رہی ہے۔لیڈی ولنگڈن ہسپتال لاہور میں 5ارب روپے سے 200 بیڈز کا مدر اینڈ چائلڈ بلاک فنکشنل کیا جا رہا ہے جبکہ گجرات میں چلڈرن ہسپتال کے لیے اراضی حاصل کرنے کیلئے500ملین مختص کئے گئے ہیں۔
وزیراعلیٰ نے کہا کہ چلڈرن ہسپتال لاہور میں 2ارب روپے سے جدید ریڈیو تھراپی یونٹ قائم کیا جا رہا ہے۔عزیز بھٹی شہید ٹیچنگ ہسپتال گجرات میں 390ملین روپے سے میڈیسن سٹور تعمیر کیا رہا ہے۔گجرات ٹیچنگ ہسپتال میں ماڈرن آپریشن تھیٹرز10بیڈڈ آئی سی یو اور لانڈری بنائی جائے گی۔انہوں نے کہا کہ گنگا رام ہسپتال لاہور کے پرانے بلاک کی 200 ملین روپے کی لاگت سے اپ گریڈ یشن کی جائے گی۔گنگا رام ہسپتال سپروائزری سٹاف کے لئے رہائشی فلیٹس تعمیر کئے جائیں گے۔ انہوں نے کہا کہ پنجاب انسٹی ٹیوٹ آف نیورو سائنسز میں 5 کروڑ 75 روپے کی لاگت سے بشیر احمد آڈیٹوریم بنایا گیا ہے جبکہ پنجاب تھیلیسیمیا پروگرام کا دائرہ کار وسیع کیا جا رہا ہے اور اس مقصد کیلئے 346 ملین روپے کے فنڈز مختص کئے گئے ہیں۔ وزیراعلیٰ چودھری پرویز الٰہی نے کہا کہ علاج معالجے کی بہترین سہولتوں کی فراہمی کیلئے 26 ارب کے فنڈز عوامی حکومت کا تحفہ ہے۔ 4 ماہ کے دوران شعبہ صحت کو جدید خطوط پر استوار کرنے کیلئے تیز رفتاری سے کام کیا ہے۔
بچوں سے زیادتی کیس کے ملزم کو سرکاری نوکری کیسے ملی؟ بات پارلیمنٹ تک پہنچ گئی
انٹرنیشنل ڈارک ویب کے گرفتار سرغنہ کے جرائم ٹریس ہونے میں اہم پیش رفت
قصور کے بعد بچوں سے بد فعلی کے شہر قائد میں بڑھتے واقعات،ملزم کیا کام کرتا ہے؟
وزیراعلیٰ چودھری پرویز الٰہی نے ہیلتھ کی معیاری سہولتوں کی فراہمی میں شب و روز مصروف صوبائی وزیر ڈاکٹر یاسمین راشد اور ان کی پوری ٹیم کو مبارکباد دی۔ سیکرٹری سپیشلائزڈ ہیلتھ کیئر اینڈ میڈیکل ایجوکیشن نے ہیلتھ کے پراجیکٹس کے بارے میں بریفنگ دی۔ صوبائی وزیر سپیشلائزڈ ہیلتھ کیئر اینڈ میڈیکل ایجوکیشن ڈاکٹر یاسمین راشد، صوبائی مشیر عامر سعید راں، ایم پی اے رانا شہباز احمد، پرنسپل سیکرٹری وزیراعلیٰ محمد خان بھٹی، سابق صدر بینک آف پنجا ب ہمیش خان، سیکرٹری سپیشلائزڈ ہیلتھ اینڈ میڈیکل ایجوکیشن، سیکرٹری اطلاعات، وائس چانسلر یونیورسٹی آف چائلڈ ہیلتھ سائنسزڈاکٹر مسعود صادق، پرنسپل علامہ اقبال میڈیکل کالج ڈاکٹر ندیم حفیظ بٹ،ایم ایس جنرل ہسپتال ڈاکٹر خالد بن اسلم، ایگزیکٹو ڈائریکٹر پنجاب انسٹی ٹیوٹ آف نیورو سائنسز پروفیسر ڈاکٹر خالد محمود، پروفیسر ڈاکٹر آصف بشیر، پرنسپل فاطمہ جناح میڈیکل کالج، ایگزیکٹو ڈائریکٹر چودھری پرویز الٰہی انسٹی ٹیوٹ آف کارڈیالوجی وزیر آباد ڈاکٹر وحید، ایم ایس عزیز بھٹی شہید ہسپتال گجرات ڈاکٹر عابد غوری، ایگزیکٹو ڈائریکٹر پنجاب انسٹی ٹیوٹ آف کارڈیالوجی لاہور پروفیسر ڈاکٹر بلال محی الدین اور متعلقہ حکام بھی اس موقع پر موجود تھے