نامور اداکار اور کامیڈین ماجد جہانگیرانتقال کرگئے

پاکستان شوبز انڈسٹری کے نامور اداکار اور کامیڈین ماجد جہانگیر لاہور میں انتقال کرگئے-

باغی ٹی وی: پاکستان کے نامور کامیڈین واداکار ماجد جہانگیر طویل عرصے سے بیمار تھے اور لاہور کے نجی ہسپتال میں زیر علاج تھے ان کے اہل خانہ کے مطابق اداکار پر فالج کا حملہ ہوا تھا جس کے بعد وہ شدید بیماری میں مبتلا رہے۔

ماجد جہانگیر ایک ماہ قبل گھر پر بیڈ سے گرگئے تھے جس کے باعث ان کی ریڑھ کی ہڈی میں فریکچر ہوگیا تھا ماجد جہانگیر کو سانس کا مرض پہلے ہی لاحق تھا جو شدت اختیار کر گیا تھا۔

اداکار ماجد جہانگیر کے اہل خانہ نے چند روز قبل عوام سے ان کی صحت یابی کیلئے دعا کی درخواست کی تھی اداکار کی منہ بولی بیٹی کے مطابق نامور اداکار کے آخری الفاظ یہ تھے کہ یااللہ مجھے معاف کرنا جب کہ ان کی آخری وقت میں عمرہ ادا کرنے کی خواہش رکھتے تھے اور وہ اکثر مجھے کہا کرتے تھے کہ میں تمہیں عمرہ اور حج کے لیے لے کر جاؤں گا۔

ذرائع نے بتایا ہے کہ سینئر اداکار ماجد جہانگیر بحریہ ٹاؤن لاہور میں رہائش پذیر تھے جب کہ ان کے بچے کراچی میں رہائش پذیر ہیں جو اپنے والد کی موت کی خبر سن کر لاہور آئے،بیٹے فہد جہانگیر کا کہنا ہے کہ والد کی تدفین کراچی میں کی جائے گی۔

ماجد جہانگیر نے پی ٹی وی کے پروگرام ففٹی ففٹی سے شہرت پائی-