ملک میں بڑھتی مہنگائی اور پٹرولیم مصنوعات میں اضافے کے خلاف تحریک لبیک پاکستان کی جانب سے آج ملک گیر ہڑتال کا اعلان کیا گیا ہے۔
باغی ٹی وی: ہڑتال کے پیش نظر کراچی میں کھارادربرنس روڈ، اولڈ سٹی ایریامیں کہیں کہیں ہوٹل بند ہیں جبکہ شہرکی غیر یقینی صورتحال پر متعدد اسکول بھی آج بند ہیں تاہم سڑکوں پر ٹرانسپورٹ رواں دواں ہے۔
دوسری جانب ہڑتال کی کال پر نواب شاہ میں چکرا بازار، مارکیٹ روڈ اور سکرنڈ روڈ پر دکانیں بند ہیں جب کہ قاضی احمد شہر میں بھی دکانیں بند اور ٹریفک معمول سے کم ہے۔
سجاول میں پبلک پارک، مین بس اسٹاپ سمیت تجارتی مراکز، ہوٹل اور پٹرول پمپس بند ہیں جب کہ حب میں اوتھل، وندر اور بیلہ میں شٹرڈاؤن ہڑتال ہے، اس موقع پر کاروباری مراکز اور پیٹرول پمپس بھی بند ہیں۔
دوسری جانب تاجر تنظیموں نے تحریک لبیک پاکستان کی 27 فروری کی ہڑتال سے لاتعلقی کا اعلان کرتے ہوئے مارکیٹیں کھولنے اور کاروبار جاری رکھنے کے عزم کا اظہار کیا-
آل پاکستان انجمن تاجران کے صدر اجمل بلوچ نے ایک بیان میں کہا ہے کہ تحریک لبیک پاکستان کے ذمہ داروں نے از خود ہی ہڑتال کا اعلان کر رکھا ہے، تاجر برادری نے آج تک کسی بھی سیاسی جماعت کی کال پر ہڑتال نہیں کی،سیاسی جماعتیں ہمیشہ مہنگائی مارچ لانگ مارچ اور دھرنوں کا اعلان کرتی ہیں، تحریک لبیک کے ذمہ داران اپنے اعلان پر نظر ثانی کریں۔
اجمل بلوچ نے کہا کہ اس میں کوئی شک نہیں کہ حکومت نے عوام پر انتہا کا ظلم ڈھا رکھا ہے۔ پیٹرول، بجلی اور گیس کی قیمتوں نے عوام کا بھرکس نکال دیا ہے، ملک اس وقت سیاسی عدم استحکام کی وجہ سے دلدل میں پھنستا جا رہا ہے جس دن ملک سیاسی بحران سے نکل آیا معاشی بحران بھی ختم ہو جائے گا۔ جب تک عوام سڑکوں پر نہیں نکلیں گے بات نہیں بنے گی، عوام اس حکومت کے خلاف سڑکوں پر نکلیں انشااللہ تاجر دو قدم آگے ہوں گے۔
