امریکی سٹیٹ ڈیپارٹمنٹ نے ایک ٹوئٹ میں لکھا ہے کہ ہم ہندوستان کے ساتھ کھڑے ہیں۔ 4افراد ’مولانا مسعود اظہر، حافظ سعید، ذکی الرحمن لکھوی اور داود ابراہیم‘ کو دہشت گردقرار دینے کے لئے نئے قانون کو استعمال کرنے پر اس کی تعریف کرتے ہیں۔ ٹوئٹ کے مطابق یہ نیا قانون دہشت گردی کی لعنت سے نمٹنے کے لئے امریکہ اور بھارت کی مشترکہ کوششوں کے امکانات کو وسعت دیتا ہے۔
یاد رہے کہ مودی حکومت نے قانون (یو اے پی اے) کے تحت داود ابراہیم، حافظ محمد سعید، مولانا مسعود اظہر اور زکی الرحمن لکھوی کو دہشت گرد قرار دیا ہے۔
مذکورہ چاروں افراد کے خلاف ریڈ کارنر نوٹس بھی جاری کیا گیا تھا۔ بھارتی حکومت کا کہنا تھا کہ آنے والے دنوں میں اس طرح کے مزید ناموں کو فہرست میں شامل کیا جائے گا۔
یہ فیصلہ پارلیمنٹ کی جانب سے غیر قانونی سرگرمی قانون میں ایک اہم ترمیم کی منظوری کے قریب ایک ماہ بعد کیا گیا ہے۔یو اے پی اے ایکٹ میں ہونے والی ترامیم کے مطابق کسی بھی شخص کو انفرادی طور پر دہشت گرد قرار دیا جاسکتا ہے۔ اس سے قبل صرف گروہوں یا تنظیموں کو ہی دہشت گرد قرار دیا جاسکتا تھا۔
