اسلام آباد : وزیراعظم عمران خان کی اوور سیز پاکستانیوں کے لیے ہمدردیاں اور کوششیں رنگ لانے لگیں، اب سمندر پار تمام پاکستانی وطن عزیز میں مسائل کے حوالے سے پریشان نہیں رہیں گے ، اطلاعات کے مطابق زمینوں پر قبضے ، این او سی، کریکٹر سرٹیفیکٹ اور دیگر مسائل کے حل کیلئے خصوصی ڈیسک بنائے جائیں گے۔
اسلام آباد سے ذرائع کے مطابق اوورسیز پاکستانیوں کے مسائل حل کرنے کیلئے خصوصی ڈیسک کا قیام عمل میں لانے کا فیصلہ کیا گیا ہے جس کی تجویز وزیر اعظم کو بھیجی گئی تھی جس کی انہوں نے منظوری دیدی ہے، بیرون ملک سفارتخانوں میں خصوصی ڈیسک قائم کر کے پاکستان کے تھانوں کیساتھ لنک اپ کردیاجائےگا، بیرون ملک پاکستانی وطن آئے بغیر اپنے کیسز وہیں سے درج کروا سکیں گے۔
وزیراعظم کی ہدایت پر بیرون ملک قائم سفارتخانوں کے خصوصی ڈیسک کو پولیس کی جانب سے یوزر اور پاس ورڈ فراہم کیا جائے گا، اوورسیزپاکستانیوں کو این اوسی اور کریکٹر سرٹیفیکٹ کے حصول کا طریقہ کار بھی آسان بنایا جائے گا، 7 سے 15 دن کے اندر این او سی اور کریکٹر سرٹیفیکیٹ فراہم کیا جاسکے گا۔
ذرائع کے حوالے سے یہ بھی معلوم ہوا ہے کہ ای میل کے ذریعے بھی سہولت فراہم کی جائے گی، اوورسیز پاکستانی مقررہ فیس کے ذریعے سہولت حاصل کرسکیں گے، اکتوبر کے پہلے ہفتے میں پراجیکٹ شروع کر دیا جائے گا۔
