نصیرآباد : مون سون کی بارشیں، ڈپٹی کمشنر کا ہنگامی دورہ

نصیرآباد(باغی ٹی وی رپورٹ) مون سون کی بارشوں کے پیش نظر ڈپٹی کمشنر نصیرآباد، بتول اسدی نے ضلع میں ہنگامی صورتحال کا جائزہ لینا شروع کر دیا ہے۔ انہوں نے تحصیل تمبو کے مختلف علاقوں کا دورہ کرکے ممکنہ خطرے کا اندازہ لگایا اور متعلقہ حکام کو ہدایت کی کہ وہ ہر صورتحال سے نمٹنے کے لیے تیار رہیں۔

ڈپٹی کمشنر نے میڈیا سے گفتگو کرتے ہوئے کہا کہ ضلع کے تمام تحصیلداروں کو ہائی الرٹ کر دیا گیا ہے تاکہ کسی بھی ہنگامی صورتحال سے فوری نمٹا جا سکے۔ انہوں نے صحافیوں سے بھی اپیل کی کہ وہ کسی بھی غیر معمولی صورتحال کی اطلاع فوری طور پر انتظامیہ کو دیں۔

ڈپٹی کمشنر نے بتایا کہ وزیر اعلیٰ بلوچستان کی ہدایت پر پی ڈی ایم اے نے متاثرین کی مدد کے لیے اشیائے خوردونوش اور خیمے وغیرہ فراہم کر دیے ہیں۔