ڈیرہ غازیخان:رودکوہی سیلاب زدگان کی امداد جاری، ریلیف کیمپ قائم

ڈیرہ غازیخان (باغی ٹی وی رپورٹ) رودکوہی سیلاب زدگان کی امداد جاری، ریلیف کیمپ قائم

تفصیل کے مطابق حکومت پنجاب کی ہدایت پر ضلع ڈیرہ غازیخان میں رودکوہیوں کے سیلابی پانی سے متاثرین کی امداد کے لیے ضلعی انتظامیہ بھرپور کوششیں کر رہی ہے۔

کمشنر ڈاکٹر ناصر محمود بشیر اور ڈپٹی کمشنر مہر شاہد زمان لک کی زیر نگرانی سیلاب سے متاثرہ بستی شہانی، جیون جندانی اور گاموں والا میں متاثرین کو کھانے پینے کا سامان سمیت دیگر ضروری اشیاء فراہم کی جا رہی ہیں۔

اس سلسلے میں پولیٹیکل اسسٹنٹ محمد اسد چانڈیہ اور اسسٹنٹ کمشنر تیمور عثمان نے بتایا کہ گزشتہ روز وڈور نالہ میں 75 ہزار کیوسک پانی آنے کی وجہ سے دیگر نواحی علاقوں میں پانی جمع ہو گیا تھا۔ ضلعی انتظامیہ نے محکمہ انہار کے ساتھ مل کر مانکہ پر دو کٹ لگا کر پانی کے بہاؤ کو کم کرنے کی کوششیں کیں۔

انہوں نے مزید بتایا کہ سیلابی پانی کے متاثرین کو رات کے کھانے کے علاوہ صبح کا ناشتہ بھی فراہم کیا گیا ہے۔ متاثرین کی رہائش کے لیے لوہار وا لا، گد پور اور بستی شہانی میں ریلیف کیمپ بھی قائم کر دیے گئے ہیں۔