پاکستان بحریہ کا جدید جہاز پی این ایس حنین عمان کا دورہ، دو طرفہ مشقوں میں حصہ لیا
![NAVY PNS](https://baaghitv.com/wp-content/uploads/2024/08/Navy-PNS-HUNAIN-was-delivered-to-the-Pakistani-Marines.webp)
پاکستانی بحریہ کا جدید جنگی جہاز پی این ایس حنین نے اپنے رومانیہ سے پاکستان کے لیے پہلے سفر کے دوران عمان کی بندرگاہ سلالہ کا دورہ کیا۔ اس دورے کے دوران، پی این ایس حنین نے رائل عمانی بحریہ کے جہاز کے ساتھ مشترکہ مشقوں میں حصہ لیا۔پاک فوج کے شعبہ تعلقات عامہ (آئی ایس پی آر) کے مطابق، سلالہ بندرگاہ پہنچنے پر پی این ایس حنین کا عمان کی رائل نیوی کے افسران نے گرمجوشی سے استقبال کیا۔ اس دوران، دونوں ممالک کے درمیان پیشہ ورانہ معلومات اور تجربات کا تبادلہ کیا گیا، اور مختلف دو طرفہ سرگرمیاں اور نیول یونٹس کے دورے کا انعقاد کیا گیا۔دورے کے اختتام پر، پی این ایس حنین نے عمان بحریہ کے جہاز SADH کے ساتھ ایک مشترکہ بحری مشق کی۔ اس مشق کا مقصد دونوں بحری افواج کے درمیان باہمی تعاون کو مزید مستحکم کرنا تھا۔پی این ایس حنین دامن نیول شپ یارڈ رومانیہ میں تعمیر کیے جانے والے پاکستانی بحریہ کے چار یرموک کلاس جہازوں میں سے تیسرا جہاز ہے۔ اس جہاز کی باقاعدہ شمولیت کی تقریب نیول ڈاکیارڈ کراچی میں 6 ستمبر کو منعقد کی جائے گی۔