پی ٹی آئی اور اسٹیبلشمنٹ میں ڈیڈ لاک ختم ہونے کی امید، بات چیت کے دروازے کھلے ہیں: رؤف حسن
![Rauf hassan](https://baaghitv.com/wp-content/uploads/2024/09/Rauf-Hassan-.jpg)
پاکستان تحریک انصاف (پی ٹی آئی) کے انفارمیشن سیکریٹری رؤف حسن نے اس امید کا اظہار کیا ہے کہ اسٹیبلشمنٹ اور پی ٹی آئی کے درمیان جاری ڈیڈ لاک جلد ختم ہو جائے گا۔ انہوں نے واضح کیا کہ پارٹی اسٹیبلشمنٹ کے ساتھ بات چیت کے لیے دروازے کھلے رکھے ہوئے ہے تاکہ ملک کے مفاد میں آگے بڑھنے کا راستہ تلاش کیا جا سکے۔رؤف حسن نے امریکی خبر رساں ادارے "وائس آف امریکا” کو دیے گئے انٹرویو میں کہا کہ پی ٹی آئی اسٹیبلشمنٹ کو سیاست میں ملوث نہیں کرنا چاہتی، بلکہ ریاستی مفاد کو مدنظر رکھتے ہوئے بات چیت کی حمایت کرتی ہے۔ ان کا کہنا تھا کہ اسٹیبلشمنٹ کے ساتھ بات چیت ہی وہ راستہ ہے جس کے ذریعے ملک کو موجودہ بحران سے نکالا جا سکتا ہے۔
انہوں نے زور دیا کہ حقیقی مینڈیٹ عوام کے پاس جانا چاہیے اور یہ عدالتی عمل یا نئے انتخابات کے ذریعے ممکن ہونا چاہیے۔ رؤف حسن نے مطالبہ کیا کہ ملک میں فوری طور پر انتخابات منعقد کیے جائیں تاکہ عوامی مینڈیٹ کی تصحیح ہو سکے اور عوام کی منتخب کردہ قیادت کو حکومت میں آنے کا موقع ملے۔رؤف حسن نے پی ٹی آئی کی آئندہ کی حکمت عملی کے حوالے سے بھی تفصیلات فراہم کیں۔ انہوں نے اعلان کیا کہ 8 ستمبر سے پی ٹی آئی ملک گیر تحریک کا آغاز کر رہی ہے جس میں پاکستان کے تمام بڑے شہروں میں جلسے کیے جائیں گے۔ ان کا کہنا تھا کہ جلسے کی اجازت ملے یا نہ ملے، پی ٹی آئی اپنے پلان پر عمل درآمد ضرور کرے گی اور 8 ستمبر کو ہر حال میں جلسہ منعقد کیا جائے گا۔
پی ٹی آئی کے ترجمان نے حکومت مخالف اتحاد میں مزید جماعتوں کے شامل ہونے کا عندیہ بھی دیا۔ انہوں نے بتایا کہ جمعیت علمائے اسلام (جے یو آئی) کے ساتھ مشترکہ حکمت عملی بنانے پر اتفاق ہوا ہے اور پی ٹی آئی وفد کی مولانا فضل الرحمان سے ہونے والی ملاقات کو خوشگوار قرار دیا۔ رؤف حسن نے کہا کہ پی ٹی آئی ملک میں حقیقی جمہوریت کی بحالی کے لیے اپنی جدوجہد جاری رکھے گی اور اس مقصد کے لیے ہر ممکن قدم اٹھائے گی۔پی ٹی آئی کی جانب سے اس قسم کی بیانات اور آئندہ تحریک کے اعلانات نے ملکی سیاست میں ایک نئی ہلچل پیدا کر دی ہے۔ دیکھنا یہ ہوگا کہ اسٹیبلشمنٹ اور پی ٹی آئی کے درمیان جاری کشیدگی کے اس ماحول میں یہ بات چیت کہاں تک کامیاب ہوتی ہے اور آئندہ انتخابات کا عمل کیا رخ اختیار کرتا ہے۔