اسلام آباد،پشاور(باغی ٹی وی رپورٹ)آل گورنمنٹ ایمپلائز گرینڈ الائنس (اگیگا) نے حکومت کی جانب سے پنشن اصلاحات کے خلاف 22 جنوری کو ملک گیر احتجاج کرنے کا اعلان کر دیا ہے۔ اگر مطالبات تسلیم نہ کیے گئے تو 10 فروری کو پارلیمنٹ ہاؤس کے سامنے دھرنا دیا جائے گا۔
اگیگا کے چیف کوآرڈینیٹر رحمان علی باجوہ کے مطابق اسلام آباد میں کیو بلاک سے پارلیمنٹ ہاؤس تک ریلی نکالی جائے گی۔ لاہور میں ناصر باغ سے صوبائی اسمبلی یا وزیراعلیٰ ہاؤس تک احتجاج کیا جائے گا، جبکہ پشاور میں خیبرپختونخوا اسمبلی کے سامنے مظاہرہ ہوگا۔ احتجاج کے دوران حکومت کو چارٹر آف ڈیمانڈ پیش کیا جائے گا۔
اگیگا کا کہنا ہے کہ آئی ایم ایف کی شرائط پر سرکاری ملازمین کا معاشی قتل کسی صورت قبول نہیں۔ اتحاد نے واضح کیا ہے کہ "پنشن بچاؤ اور حقوق بچاؤ” تحریک اس وقت تک جاری رہے گی جب تک مطالبات تسلیم نہیں کیے جاتے۔
وفاقی حکومت نے اخراجات کم کرنے کے لیے یکم جنوری 2025 کو پنشن اصلاحات کا نوٹیفیکیشن جاری کیا۔ اس کے مطابق ریٹائرڈ ملازمین کی پنشن آخری 24 ماہ کی اوسط تنخواہ کی بنیاد پر کیلکولیٹ کی جائے گی۔
نوٹیفیکیشن میں ڈبل پنشن لینے پر پابندی عائد کی گئی ہے، اور صرف ایک پنشن کی اجازت ہوگی۔ ریٹائرمنٹ کے وقت کی پنشن کو بیس لائن تصور کیا جائے گا، جس پر آئندہ اضافہ ہوگا۔ اگر حاضر سروس یا پنشنر کے خاوند یا بیوہ خود بھی تنخواہ دار یا پنشنر ہوں، تو وہ بھی صرف ایک پنشن کے اہل ہوں گے۔
