لنڈی کوتل(باغی ٹی وی رپورٹ)جامعہ جنیدیہ غفوریہ میں فارغ التحصیل طلباء کی دستار بندی کی پروقار تقریب
جامعہ جنیدیہ غفوریہ کارخانوں مدرسہ سے فارغ التحصیل طلباء کے اعزاز میں ایک پروقار تقریب کا انعقاد جامعہ جنیدیہ غفوریہ گل ولی مدرسہ ولی خیل میں کیا گیا۔ اس موقع پر علاقے کے نعت خوان حضرات، علماء کرام، طلباء اور اہل علاقہ کی بڑی تعداد نے شرکت کی۔ تقریب میں شریک مہمان خصوصی سابق وفاقی وزیر مذہبی امور پیر نورالحق قادری نے خطاب کرتے ہوئے کہا کہ علم انسان کی روشنی ہے اور اس کی پھیلاؤ کا عمل علماء کی ذمہ داری ہے۔ انہوں نے مزید کہا کہ ہمارے والد نے جو بیج بویا تھا، اس کا پھل اب ان علماء کرام کی شکل میں نظر آ رہا ہے۔
پیر نورالحق قادری نے جامعہ جنیدیہ غفوریہ کارخانوں مدرسہ کی اہمیت پر روشنی ڈالتے ہوئے کہا کہ یہ مدرسہ امن، اخوت اور بھائی چارے کا درس دیتا ہے۔ انہوں نے فارغ التحصیل طلباء پر زور دیا کہ وہ ان اصولوں پر عمل کریں، کیونکہ ان میں سب کی کامیابی چھپی ہوئی ہے۔ سابق وزیر نے یہ بھی کہا کہ علم دشمن عناصر نے ہمارے علماء کرام کو شہید کر کے علم کے پھیلاؤ میں رکاوٹ ڈالنے کی کوشش کی، مگر اللہ کے فضل سے علم کی ترقی مسلسل جاری ہے اور اس مدرسہ سے ہر سال سینکڑوں طلباء فارغ ہو کر معاشرے میں اہم کردار ادا کر رہے ہیں۔
اس تقریب میں مفتی اکرام اللہ جنیدی، مفتی عصمت الرحمن، مفتی مجید اللہ جنیدی، مفتی نورالدین جنیدی، مولانا تاج علی شاہ قادری، شاہد اللہ اور امتیاز علی نے بھی اپنے خیالات کا اظہار کیا۔ تقریب کے اختتام پر فارغ التحصیل علماء کرام اور مفتی حضرات کی دستار بندی کی گئی، جس میں علماء کرام نے انہیں عزت و احترام کے ساتھ دستار پہنائی۔
