بارکھان(مریدحسین ٹالپور کی رپورٹ) چوروں نے ٹرانسفارمر کی کوائلیں چرا لیں، عوام عدم تحفظ کا شکار
تفصیل کے مطابق بلوچستان کے ضلع بارکھان کی بستی لعل محمد ساوے میں چوروں نے رات کی تاریکی میں بجلی کے ٹرانسفارمر کی کوائلیں چوری کر لیں، جس سے علاقے میں بجلی کی فراہمی معطل ہو گئی۔
ماضی میں امن و سلامتی کے لیے مشہور ضلع بارکھان میں چند مہینوں سے چوری کی وارداتوں میں خطرناک حد تک اضافہ ہو چکا ہے۔ چور دور دراز علاقوں میں موجود پانی کی مشینیں، بجلی کے ٹرانسفارمر اور شمسی پلیٹیں تک چوری کر رہے ہیں۔
علاقہ مکینوں کے مطابق، پولیس اور سیکیورٹی ادارے مجرمان کے خلاف کارروائی کرنے میں ناکام نظر آ رہے ہیں، جس کی وجہ سے عوام میں شدید بے چینی پائی جاتی ہے۔
اگر یہی صورتحال برقرار رہی تو اہل علاقہ اپنی حفاظت کے لیے بندوق اٹھانے پر مجبور ہو جائیں گے۔ عوام نے حکام بالا سے فوری نوٹس لینے اور تحفظ فراہم کرنے کی اپیل کی ہے۔
