چیف جسٹس پاکستان، جسٹس یحییٰ آفریدی نے ایس او ایس ولیج پشاور کا دورہ کیا۔ اعلامیہ کے مطابق، چیف جسٹس کے ہمراہ ان کی اہلیہ بھی موجود تھیں۔
ایس او ایس ولیج پشاور میں اس وقت 121 بچے رہائش پذیر ہیں جو کہ ادارے کی دیکھ بھال میں ہیں۔ یہ ادارہ یتیم اور بے سہارا بچوں کو تعلیم اور تربیت فراہم کرتا ہے۔دورے کے دوران، چیف جسٹس یحییٰ آفریدی اور ان کی اہلیہ نے بچوں کے ساتھ کھانا کھایا۔ چیف جسٹس یحییٰ آفریدی نے بچوں سے بات کرتے ہوئے ان کی محنت اور تعلیم کی اہمیت پر زور دیا۔ انہوں نے بچوں کو تعلیم میں محنت کرنے کی تلقین کی اور انہیں کامیابی کی راہوں پر گامزن رہنے کی دعا دی۔
چیف جسٹس یحییٰ آفریدی نے ایس او ایس ولیج کی ڈائریکٹر محترمہ کوکب بتول قریشی کی کاوشوں کو سراہا اور ان کے ادارے کی جانب سے کی جانے والی خدمات کو قابل تحسین قرار دیا۔ انہوں نے یقین دہانی کرائی کہ عدلیہ اس ادارے اور یہاں رہائش پذیر بچوں کے لیے ہر ممکن تعاون فراہم کرے گی۔چیف جسٹس کا کہنا تھا کہ ایسے ادارے معاشرتی ذمہ داریوں کا بھرپور احاطہ کرتے ہیں اور انہیں حکومتی سطح پر ہر ممکن حمایت فراہم کی جانی چاہیے تاکہ یہ ادارے اپنے مشن میں کامیاب رہیں۔
اس موقع پر بچوں نے چیف جسٹس سے اپنی زندگی کی مشکلات اور مستقبل کے حوالے سے بات کی، جس پر چیف جسٹس نے ان کی حوصلہ افزائی کی اور کہا کہ تعلیم کے ذریعے وہ اپنی زندگی کو بہتر بنا سکتے ہیں۔
