قصور،باغی ٹی وی (ڈسٹرکٹ رپورٹر طارق نوید سندھو) ڈرون کے ذریعے منشیات سمگلنگ میں ملوث پولیس اہلکار گرفتار
تفصیلات کے مطابق ڈرون کے ذریعے سرحد پار منشیات سمگلنگ میں ملوث پولیس اہلکار کو گرفتار کر لیا گیا، ملزم کے قبضے سے لاکھوں روپے مالیت کی ڈیڑھ کلوگرام ہیروئن اور 7 لاکھ روپے برآمد ہوئے۔
گرفتار پولیس اہلکار عاشق جٹ سکنہ شیخ سعد کالو والا کا رہائشی ہے۔ تفتیش کے مطابق، وہ ڈرون کے ذریعے سرحدی دیہات سے ہیروئن سمگل کرتا تھا۔ گزشتہ روز ڈرون کھیتوں میں گرنے کے تنازع پر فائرنگ کرکے ایک محنت کش کو زخمی کرنے پر اس کا جرم بے نقاب ہوا۔
ملزم کے خلاف امتناع منشیات اور 155C کے تحت مقدمہ درج کر لیا گیا، جبکہ مزید تحقیقات جاری ہیں۔
ڈی پی او قصور محمد عیسیٰ خان نے بیان دیا کہ پولیس اہلکار کو ریگولر انکوائری کے بعد نوکری سے برخاست کر دیا جائے گا، اور ضلع بھر میں منشیات فروشوں کے خلاف بلا تفریق کارروائیاں جاری رہیں گی۔
