لاہور :محکمہ سپیشلائزڈ ہیلتھ نے بجٹ فراہم کرنے کی بجائے ٹیچنگ ہسپتالوں کی انتظامیہ کواپنے وسائل سے مکمل کرنے کا حکم دیدیا ۔اس فیصلے کے ساتھ ہی وزیر اعظم کی ہدایت کے باوجود لاہور کے پانچ بڑے ہسپتالوں کی ری ویمپنگ کا منصوبہ کھٹائی میں پڑ گیا،
ذرائع کے مطابق وزیر اعظم عمران خان نے لاہور کے دورے کے دوران رواں ماہ کے اوائل میں ہدایت کی تھی کہ میو ہسپتال، سروسز ہسپتال، گنگا رام ہسپتال، جناح ہسپتال اور جنرل ہسپتال کی ری ویمپنگ کی جائے اور طبی سہولتوں کی فراہمی کو بہتر بنایا جائے۔
ذرائع کے مطابق محکمہ سپیشلائزڈ ہیلتھ نے متعدد میٹنگز کیں لیکن اب اس میگا پراجیکٹ کو مکمل کرنے کیلئے فنڈز فراہم کرنے کی بجائے تمام تر ذمہ داری ٹیچنگ ہسپتالوں کی انتظامیہ پر ڈال دی ہے، محکمہ سپیشلائزڈ ہیلتھ نے ٹیچنگ ہسپتالوں کے سربراہان کو ہدایت کی ہے کہ ری ویمپنگ کا عمل اپنے وسائل سے مکمل کریں جبکہ دوسری جانب شہر کے تمام ٹیچنگ ہسپتال گزشتہ مالی سال میں ایک چوتھائی بجٹ ہی نہ ملنے پر شدید مالی مشکلات سے دوچار ہیں
