میرپورخاص (باغی ٹی وی، نامہ نگار سید شاہزیب شاہ) محکمہ شہری دفاع، ریسکیو 1122 اور سول سوسائٹی کی جانب سے پاک فوج سے اظہار یکجہتی کے لیے اسٹیشن چوک سے مارکیٹ چوک تک ریلی نکالی گئی، جس کی قیادت ڈپٹی کنٹرولر سول ڈیفنس فہیم میمن نے کی۔
ریلی میں ریسکیو 1122، آل پرائیویٹ اسکول مینجمنٹ ایسوسی ایشن کے صدر فیصل زئی، ڈپٹی گروپ وارڈن سید دانش علی، خلیل غوری، عبد الحمید شیخ، خلیل اللہ خان سمیت بڑی تعداد میں شہریوں نے شرکت کی۔ شرکاء نے بھارت کی جارحیت کی شدید مذمت کی اور "پاکستان زندہ باد، پاک فوج زندہ باد” کے فلک شگاف نعرے لگائے۔
شرکاء نے ہاتھوں میں قومی پرچم اور افواجِ پاکستان کی حمایت میں بینرز اٹھا رکھے تھے، اور وطن کی سلامتی، فوج کی جرات و بہادری کو خراج تحسین پیش کیا۔ مقررین نے اپنے خطاب میں کہا کہ پاکستانی قوم اپنی افواج کے ساتھ شانہ بشانہ کھڑی ہے اور دشمن کو ہر محاذ پر منہ توڑ جواب دیا جائے گا۔
