میرپورماتھیلو (باغی ٹی وی، نامہ نگار مشتاق علی لغاری) ڈی آئی جی سکھر رینج کیپٹن (ر) فیصل عبداللہ چاچڑ کی ہدایات پر ضلع گھوٹکی میں جرائم پیشہ عناصر کے خلاف بھرپور ٹارگیٹڈ آپریشن جاری ہے۔ ایس ایس پی گھوٹکی ڈاکٹر سمیع اللہ سومرو کی قیادت میں سب ڈویژن رونتی کے تھانہ شہید دین محمد لغاری کی حدود میں شر، ماچھی اور میرانی گینگز کے اغواکاروں و ڈاکوؤں کے خلاف آپریشن کیا جا رہا ہے۔
پولیس اور ڈاکوؤں کے درمیان شدید فائرنگ کا تبادلہ جاری ہے۔ پولیس نے جدید ٹیکنالوجی کی مدد سے ملزمان کے ٹھکانوں کا سراغ لگا کر انہیں مسمار اور نذر آتش کر دیا ہے۔ ان مقامات سے مغویوں کے موبائل فون اور تصاویر بھی برآمد ہوئی ہیں، جن سے بازیابی کی امید مزید بڑھ گئی ہے۔
آپریشن میں ڈی ایس پی اباوڑو عبدالقادر سومرو، ڈی ایس پی رونتی زاہد حسین میرانی، مختلف تھانوں کے ایس ایچ اوز، بھاری پولیس نفری، بکتر بند اور اے پی سی گاڑیاں حصہ لے رہی ہیں۔ کچے کے علاقے میں مکمل گھیراؤ اور سخت سرچ آپریشن کیا جا رہا ہے۔
ڈی آئی جی سکھر نے کہا ہے کہ جب تک تمام اغواکاروں اور ڈاکوؤں کا خاتمہ نہیں ہو جاتا، ٹارگیٹڈ آپریشن بلاتعطل جاری رہے گا۔
