حافظ آباد میں ایک افسوسناک واقعے میں خاتون کو اس کے شوہر کے سامنے اجتماعی زیادتی کا نشانہ بنایا گیا تھا، جس کے خلاف مقدمہ درج ہے۔ اس مقدمے میں ملزم اکرام کو پولیس نے گرفتار کر رکھا ہے، تاہم اب ملزم کے بھائی نے لاہور ہائی کورٹ میں ایک درخواست دائر کی ہے۔
درخواست گزار نے عدالت سے استدعا کی ہے کہ ملزم اکرام کی پولیس مقابلے میں ہلاکت کا خدشہ ہے، جس کے پیش نظر عدالت فوری کارروائی کرے اور ملزم کو حفاظت سے عدالت کے سامنے پیش کرنے کا حکم دے۔ درخواست میں مزید بتایا گیا ہے کہ اس سنگین جرم میں ملوث دیگر ملزمان خاور منصب، خاور فیاض اور لئیق پولیس مقابلے میں ہلاک ہو چکے ہیں۔درخواست گزار کا کہنا ہے کہ پولیس کی جانب سے ملزم اکرام کو بغیر حفاظتی اقدامات کے پیش کرنے میں تاخیر اور ممکنہ خطرات کو مدنظر رکھتے ہوئے عدالت اس ضمن میں ہنگامی احکامات جاری کرے تاکہ ملزم کے خلاف عدالتی کارروائی بلا تعطل جاری رہ سکے۔
