ترک صدر نے کشمیری عوام کے حق آزادی کی آواز کو عالمی فورم پر اُٹھا کر کشمیری عوام کے دل جیت لیئے ہیں، قائم مقام صدر آزاد جموں و کشمیر

مظفرآباد۔ (اے پی پی)قائم مقام صدر آزاد جموں و کشمیر شاہ غلام قادر نے عوامی جمہوریہ تُرکی کے صدر طیب اردگان کی جانب سے جنرل اسمبلی کے اجلاس سے خطاب کے دوران مسئلہ کشمیر پر دوٹوک موقف کا خیر مقدم کرتے ہوئے کہا ہے کہ تُرکی کے عوام اور تُرک قیادت کے شُکر گزار ہیں۔ اُنہوں نے کشمیری عوام کے حق آزادی کی آواز کو عالمی فورم پر اُٹھا کر کشمیری عوام کے دل جیت لیئے ہیں۔ اُنہوں نے اس اُمید کا اظہار کیا کہ دوست ممالک کے ساتھ ساتھ خصوصی طور پر او آئی سی کے ممالک اس عالمی فورم پر کشمیری عوام کے حق خود ارادیت کی کُھل کر حمایت کریں گے۔ اُنہوں نے عالمی برادری سے اپیل کی ہے کہ وہ مقبوضہ کشمیر میں کرفیو کے خاتمے،بھارتی مظالم کے خاتمے اور ریاست جموں و کشمیر کی تاریخی حیثیت کی بحالی کے ساتھ ساتھ حق خودارادیت دلانے میں اپنا کردار ادا کریں تاکہ دو ایٹمی طاقتوں کے درمیان متوقع تباہ کُن جنگ کو روکا جا سکے۔ اُنہوں نے کہا کہ امریکن صدر بار بار ثالثی کا اعلان کرتے ہیں، اقوام متحدہ کو متحرک کر کے ریاست جموں و کشمیر کے عوام کو حق خودارادیت کا تسلیم شُدہ حق دلایا جائے۔ اگر عالمی ادارہ بھی ناکام رہا تو دُنیا کی تباہی یقینی ہے جس کی ذمہ داری عالمی طاقتوں پر ہو گی۔