وزیر اعظم محمد شہباز شریف سے داؤدی بوہرا برادری کے وفد کی ملاقات۔

اسلام آباد:وزیر اعظم محمد شہباز شریف سے داؤدی بوہرا برادری کے وفد کی ملاقات۔اطلاعات کے مطابق آج وزیراعظم شہبازشریف سے اہم وفد نے ملاقات کی ، اس وفد کی سربراہی داؤدی بوہرا کمیونٹی کے روحانی پیشوا ڈاکٹر سیدنا مفدل سیف الدین کے نمائندہ جناب کومیل یونس نے کی۔

اس موقع پر وزیراعظم شہبازشریف نے کہا کہ وہ داودی بوہرا برادری کی خدمات کی خراج تحسین پیش کرتے ہیں ، ان کا یہ بھی کہنا تھاکہ داؤدی بوہرا برادری کی پاکستان کیلئے بے شمار خدمات ہیں.

وزیرِ اعظم کا کہنا تھا کہ داؤدی بوہرا برادری ایک پر امن جماعت ہے اور آپکے رفاہی کام متاثر کن ہیں. وزیرِ اعظم نے اس موقع پر یہ بھی کہا کہ مذہبی رواداری اور برداشت بانیِ پاکستان قائدِ اعظم کے وہ دیرینہ اصول تھے جو پاکستان کی بنیادوں کا حصہ ہیں اور پاکستان کی موجودہ خارجہ پالیسی انہی کا مظہر ہے.

وزیرِ اعظم شہبازشریف نے کہا کہ معاشرے میں موجود عدم برداشت کے خاتمے اور بھائی چارے کے فروغ کیلئے ہم سب کو مل کر کام کرنے کی ضرورت ہے.وزیر اعظم نے مذہبی رواداری اور پر امن بقائے باہمی کے اصولوں کی ترویج کو پاکستان کی ترقی کے لیے بے حد ضروری قرار دیا۔

وزیر اعظم نے پاکستان میں مذہبی ہم آہنگی کے فروغ اور ملک کی سماجی و اقتصادی ترقی میں بھرپور کردار ادا کرنے پر بوہرا برادری کے کردار کو سراہاوزیرِ اعظم نے داؤدی بوہرا برادری کو سیلاب متاثرین کی مدد میں بڑھ چڑھ کر حصہ لینے کی دعوت دی. وفد نے وزیرِ اعظم کو اپنے تمام منصوبوں میں سولر توانائی کے استعمال کے بارے بتایا جس کی استعداد 6 میگاواٹ ہے. وزیرِ اعظم نے اس اقدام کو سراہا.