پشاور:خیبرپختونخوا: فائرنگ سے پی ٹی آئی کے صوبائی ڈپٹی جنرل سیکرٹری اورپی پی کا مقامی رہنما جاں بحق،اطلاعات کے مطابق خیبرپختونخوا میں فائرنگ کے دو مختلف واقعات میں پاکستان تحریک انصاف (پی ٹی آئی) خیبرپختونخوا کے ڈپٹی جنرل سیکریٹری طاہر اقبال ہری پور میں جبکہ پاکستان پیپلز پارٹی کے مقامی رہنما پشاور میں جاں بحق ہوگئے۔
پولیس کا کہنا تھا کہ ہری پور کے علاقے غازی میں نامعلوم افراد نے فائرنگ کرکے پی ٹی آئی کے صوبائی ڈپٹی جنرل سیکریٹری کو قتل کر دیا۔پولیس کے مطابق واقعہ تھانہ غازی کی حدود میں پیش آیا ہے اور اس واقعے میں مقتول کے ڈرائیور اور ساتھی زخمی ہوئےپولیس کے مطابق حملہ آور فائرنگ کے بعد جائے وقوع سے فرار ہونے میں کامیاب ہو ئے۔
ہری پور پولیس نے کہا کہ جاں بحق ہونے والے شخص کی شناخت ڈاکٹر طاہر اقبال کے نام سے کی گئی ہے، جو پی ٹی آئی کا صوبائی عہدہ دار تھاپولیس کا کہنا تھا کہ ابتدائی طور پر قتل کی وجوہات سامنے نہیں آئیں، تاہم پولیس نے تحقیقات شروع کردی ہیں۔
خیبرپختونخوا میں فائرنگ کا دوسرا واقعہ پشاور میں پیش آیا، جہاں گاڑی پر فائرنگ سے پاکستان پیپلز پارٹی (پی پی پی) کے مقامی رہنما سمیت تین افراد جاں بحق اور تین زخمی ہوئے۔
پولیس کے مطابق واقعہ تھانہ مچنی کی حدود میں پیش آیا، جہاں نامعلوم افراد نے چلتی گاڑی پر اندھا دھند فائرنگ کر دی، جس سے پی پی پی رہنما دو سیکیورٹی گارڈ سمیت جاں بحق ہو گئے۔
واقعے کے بعد زخمیوں اور لاشوں کو فوری طور پر ہسپتال منتقل کر دیا گیا۔پولیس کا کہنا تھا کہ ابھی تک کوئی گرفتاری عمل میں نہیں آئی ہے تاہم واقعہ پرانی دشمنی کا نتیجہ معلوم ہوتا ہے۔
