بین الاقوامیتازہ ترین

عبارت تبدیل کرنے کا مطلب یہ نہیں کہ اسرائیل پر سے اپنی سفری پابندی ہٹا دی ہے بنگلہ دیش وزارت خارجہ

5 سال قبل
5 سال قبل

بنگلہ دیش کی وزارتِ خارجہ کی جانب جاری بیان میں کہا گیا ہے کہ عبارت تبدیل کرنے کا مطلب یہ نہیں ہے کہ اس نے اسرائیل پر سے اپنی سفری پابندی ہٹا دی ہے۔

باغی ٹی وی : بنگلہ دیش کے پاسپورٹ پر پہلے لکھا ہوتا تھا کہ یہ اسرائیل کے علاوہ ساری دنیا کے لیے کار آمد ہے تاہم اب اس عبارت کو تبدیل کر کے یہ لکھا گیا ہے کہ ’یہ پاسپورٹ دنیا کے تمام ممالک کے لیے موزوں ہے۔‘

گزشتہ ہفتے اسرائیلی وزارت خارجہ کے ایک اہلکار گیلاڈ کوہین کی جانب سے ایک ٹویٹ میں ایک خبر شیئر کی گئی تھی جس میں یہ دعویٰ کیا گیا تھا کہ بنگلہ دیش نے کیونکہ اپنے پاسپورٹس پر عام طور شائع ہونے والی عبارت کو تبدیل کر دیا ہے اس لیے درحقیقت اس نے اسرائیل پر لگائی جانے والی اپنی سفری پابندی ہٹا دی ہے۔


دوسری جانب اس حوالے سے بنگلہ دیش کی وزارتِ خارجہ کی جانب جاری بیان میں کہا گیا ہے کہ عبارت تبدیل کرنے کا مطلب یہ نہیں ہے کہ اس نے اسرائیل پر سے اپنی سفری پابندی ہٹا دی ہے۔

وزارت خارجہ نے ایک اعلامیہ جاری کیا جس میں کہا گیا کہ اس عبارت کو تبدیل کرنے کا مقصد ای پاسپورٹس کو بین الاقوامی معیار کے مطابق رکھنا ہے اور اسرائیل کے سفر پر پابندی اب بھی برقرار ہے۔

اعلامیے میں کہا گیا ہے کہ مشرقِ وسطیٰ کے ساتھ بنگلہ دیش کی خارجہ پالیسی میں کوئی تبدیلی نہیں ہو گی اور نہ ہی بنگلہ دیشی حکومت نے اسرائیل کے معاملے پر اپنے مؤقف سے انحراف کیا ہے بنگلہ دیش اپنی طویل المدتی پوزیشن پر قائم رہے گا۔

واضح رہے کہ بنگلہ دیش اقوام متحدہ کے ان 18 رکن ممالک میں سے ہے جو اسرائیل کو تسلیم نہیں کرتے اور یہ ان متعدد ممالک میں سے ہے جہاں کے شہریوں کے لیے اسرائیل جانے کی سفری پابندی عائد ہے۔

ٹیگز:
Shares:

مزید خبریں