اوچ شریف (باغی ٹی وی،نامہ نگارحبیب خان) اوچ شریف کے نواحی علاقے میں واقع عباسیہ لنک کینال پل رئیساں کی زبوں حالی نے مقامی عوام کو شدید تشویش میں مبتلا کر رکھا ہے۔ پل کی حفاظتی دیواروں کے غائب ہونے کے باعث متعدد حادثات رونما ہو چکے ہیں، جن میں انسانی جانوں کا نقصان بھی شامل ہے۔
مقامی باشندے محمد اکمل، محمد عمران، محمد رفیق، جام نور محمد، محمد اجمل اور دیگر نے احتجاج کرتے ہوئے کہا کہ یہ پل اب ان کے لیے موت کی علامت بن چکا ہے۔ پل کی مرمت نہ ہونے کی وجہ سے انہیں روزمرہ کی زندگی میں شدید مشکلات کا سامنا ہے۔
علاقہ مکینوں اور سماجی تنظیموں نے بارہا انتظامیہ سے پل کی مرمت اور حفاظتی تدابیر پر فوری توجہ دینے کا مطالبہ کیا ہے، لیکن اب تک کوئی خاطر خواہ اقدامات نہیں اٹھائے گئے ہیں۔ متعلقہ حکام کی جانب سے خاموشی اختیار کر رکھی ہے جس سے عوام میں مایوسی اور عدم اعتماد کی لہر دوڑ گئی ہے۔
شہریوں نے حکومت سے اپیل کی ہے کہ وہ فوری طور پر پل کی مرمت کے لیے اقدامات کریں تاکہ انسانی جانوں کی حفاظت کو یقینی بنایا جا سکے۔
