افغانستان:کابل میں دھماکا،18افراد ہلاک، متعدد زخمی

کابل: افغانستان کے دارالحکومت کابل کے بازار میں بم دھماکے کے نتیجے میں 18 افراد ہلاک جبکہ 20 سے زائد زخمی ہوگئے۔غیر ملکی خبر رساں ایجنسی کے مطابق دھماکا کابل کے مصروف ترین بازار میں ہوا، جس میں ہزارہ برادری کو نشانہ بنایا گیا ہے۔

ترجمان افغان وزرت داخلہ کا کہنا ہے کہ دھماکے کی اطلاع ملتے ہی امدادی ٹیمیں اور سیکیورٹی حکام جائے وقوعہ پر پہنچ گئی ہے، جاں بحق ہونے والوں اور زخمیوں کو فوری طور پر اسپتال منتقل کردیا گیا ہے، جہاں انہیں طبی امداد دی جارہی ہے۔

حکام کا کہنا ہے کہ بازار میں زیادہ تر ہزارہ برادری کے لوگ جمع ہوتے ہیں، تحقیقاتی ٹیم نے حادثہ کی تحقیقات کا آغاز کردیا ہے، فوری طور پر کسی گروپ نے حملے کی ذمہ داری قبول نہیں کی۔

خیال رہے کہ گزشتہ روز بھی کابل میں مسجد کے قریب بم دھماکہ ہوا تھا، جس میں 8 افراد ہلاک جبکہ 18 زخمی ہوگئے تھے، طالبان حکام کا کہنا تھا کہ بم ایک ریڑھی میں نصب تھا۔گزشتہ روز ہونے والے بم دھماکے کی ذمہ داری داعش نے قبول کی تھی۔

طالبان کے ترجمان ذبیح اللہ مجاہد نےجمعے کی شام ایک ٹویٹ میں لکھا کہ `کابل کے چھ شہروں کے علاقے میں آج شہریوں کے درمیان ایک گاڑی پر دھماکہ خیز مواد نصب کر کے دھماکہ گیا تھا۔

دھماکے میں آٹھ ہلاکتوں کی تصدیق کی گئی ہے۔ ذبیح اللہ مجاہد کا کہنا ہے کہ امارت اسلامیہ افغانستان اس بزدلانہ کارروائی کی شدید الفاظ میں مذمت کرتی ہے۔‘

انھوں نے زور دے کر کہا کہ `ان لوگوں کی ایسی حرکتیں دین اور ملک کے دشمن ہیں، جو ہماری قوم کی سلامتی اور خوشی نہیں چاہتے۔‘

دھماکے کے بعد سوشل نیٹ ورکس پر شائع ہونے والی ایک ویڈیو میں دکھایا گیا ہے کہ گلیوں میں بہت سے ہلاک اور زخمی افراد موجود ہیں۔ ان افراد کے بارے میں کہا جا رہا ہے کہ وہ کابل کے مغرب میں واقع سرکاریز میں ایک مسجد سے باہر نکل رہے ہیں۔