باغی ٹی وی کی رپورٹ کے مطابق وزیر خارجہ شاہ محمود قریشی آج قطر کے دارالحکومت دوحہ میں ہونے والے افغان امن مذاکرات میں ویڈیو کانفرنس کے ذریعے شرکت کریں گے۔
وزیر خارجہ شاہ محمود قریشی افغان دھڑوں کے درمیان مذاکراتی عمل کی تقریب سے خطاب کریں گے۔ دوسری جانب وزیراعظم عمران خان نے کہا ہے کہ پاکستان نے انتھک کوششوں کے ذریعے افغان امن عمل کو آسان بنانے میں اہم کردار ادا کیا۔
انٹرا افغان مذاکرات کے آغاز کا خیر مقدم کرتے ہوئے وزیراعظم عمران خان کا کہنا تھا کہ کہ مشترکہ کوششوں سے وہ دن آن پہنچا جس کا افغان عوام کو انتظار تھا،40 سال سے افغان عوام تنازعات اور خون ریزی سے دوچار تھی۔ پاکستان نے دہشت گردی کیخلاف جنگ میں جانی ومالی نقصان اٹھایا، شروع دن سے میرا یہی موقف تھا کہ افغان مسئلے کا فوجی حل نہیں۔ اس کا واحد حل مذاکرات اور سیاسی تصفیہ تھا۔
وزیراعظم عمران خان کا مزید کہنا تھا کہ خطے میں امن کیلئے افغان مفاہمتی عمل کی کامیابی ناگزیر ہے۔ امید ہے فریقین اپنے کیے گئے وعدوں کی پاسداری کریں گے اور مطلوبہ نتائج کے حصول کیلئے ثابت قدم رہیں گے۔امن و ترقی کے سفر میں پاکستان افغان عوام کے ساتھ کھڑا رہے گا، آج ہم اپنی ذمہ داری پوری کرنے پر اطمینان محسوس کرتے ہیں۔افغان رہنماؤں کی ذمہ داری ہےکہ وہ تاریخی موقع سے فائدہ اٹھائیں اور مل کر سیاسی تصفیہ کیلئے مثبت انداز میں کام کریں۔
واضح رہے کہ افغان امن مذاکرات کا پہلا اجلاس آج قطر میں ہو گا۔ڈاکٹر عبداللہ عبداللہ کابل انتظامیہ جبکہ جسٹس مولوی عبدالحکیم حقانی طالبان وفدکے سربراہ ہیں، امریکی وزیر خارجہ مائیکل آر پومپیو افغان امن مذاکرات کی افتتاحی تقریب میں شرکت کریں گے، یہ مذاکرات امریکہ۔طالبان معاہدے اور امریکہ۔افغانستان مشترکہ اعلامیے کے نتیجے میں شروع ہو رہے ہیں۔ یہ معاہدہ اور اعلامیہ فروری میں طے پایا تھا
افغان امن عمل کو نقصان پہنچانےوالوں کو مل کر شکست دینگے، ڈی جی آئی ایس پی آر
