کے پی کے بعد بلوچستان میں بھی بلدیاتی انتخابات، حلقہ بندیوں کا شیڈول جاری

کوئٹہ :کے پی کے بعد بلوچستان میں بھی بلدیاتی انتخابات، حلقہ بندیوں کا شیڈول جاری ،اطلاعات کے مطابق کے پی کے بعد اب الیکشن کمیشن نے بلوچستان میں بلدیاتی انتخابات کے سلسلے میں یونینز اور وارڈز کونسل حلقہ بندیوں کا ‏شیڈول جاری کر دیا۔

اس حوالے سے الیکشن کمیشن نے باقاعدہ نو ٹی فکیشن جاری کیا ہے جس میں ہدایت کی گئی ہے کہ 6 سے 20 ‏دسمبر تک تمام انتظامات مکمل کر لئےجائیں۔ ‏

الیکشن کمیشن کا کہنا ہے کہ 15دن میں حلقہ بندی کمیٹیوں کےنوٹی فکیشن جاری کئےجائیں گے 19جنوری ‏تک30دن میں حلقوں،وارڈزکی فہرستیں تیارکی جائیں گی حلقوں اور وارڈزکی ابتدائی فہرست یکم جنوری کو جاری ‏کر دی جائے گی۔

الیکشن کمیشن کے مطابق حلقہ بندیوں پراعتراضات21جنوری سے4فروری تک داخل ہوں گے اور 19فروری تک ‏حلقہ بندیوں پراعتراضات نمٹا ئےجائیں گے وارڈز اور حلقوں کی فہرست26 فروری کو جاری کی جائے گی۔

یاد رہے کہ اس سے پہلے الیکشن کمیشن آف پاکستان (ای سی پی) نے خیبر پختونخوا (کے پی) میں بلدیاتی انتخابات کے پہلے مرحلے کا شیڈول جاری کردیا۔ای سی پی سے جاری نوٹیفکیشن کے مطابق خیبر پختونخوا میں بلدیاتی انتخابات کے پہلے مرحلے میں پولنگ 19 دسمبر کو ہو گی۔

نوٹیفکیشن کے مطابق خیبرپختونخوا میں پہلے مرحلے میں پشاور، نوشہرہ، کوہاٹ، ڈی آئی خان، لکی مروت، مالاکنڈ، باجوڑ، مردان، صوابی، کرک، بنوں، ٹانک، ہری پور، خیبر، چارسدہ، ہنگو اور مہمند میں انتخابات ہوں گے۔

ای سی پی نے کہا کہ ریٹرننگ افسران کاغذات نامزدگی کے لیے یکم نومبر کو نوٹس جاری کریں گے، جس کے بعد امیدوار 4 تا 8 نومبر تک کاغذات نامزدگی جمع کرا سکیں گے۔

ریٹرننگ افسران کاغذات جمع کرانے والے امیدواروں کی فہرستیں 9 نومبر کو جاری کریں گے، جس کے بعد 10 سے 12 نومبر کے دوران کاغذات نامزدگی کی اسکروٹنی کریں گے۔

ای سی پی نے بتایا کہ بلدیاتی انتخابات میں حصہ لینے والے امیدوار 13 سے 16 نومبر تک اسکروٹنی سے متعلق اپیلیں دائر کر سکیں گے اور ایپیلٹ ٹریبونلز 19 نومبر تک اپیلوں پر فیصلے کریں گے۔

بلدیاتی انتخابات کے پہلے مرحلے کے شیڈول کے مطابق امیدواروں کی نظرثانی شدہ فہرستیں 20 نومبر کو جاری کی جائیں گی جبکہ 22 نومبر تک امیدوار اپنے کاغذات نامزدگی واپس لے سکیں گے۔

نوٹیفکیشن میں کہا گیا کہ نامزد امیدواروں کو 23 نومبر کو انتخابی نشانات الاٹ کیے جائیں گے۔ای سی پی نے کہا کہ 19 دسمبر کو بلدیاتی انتخابات کے بعد پہلے مرحلے کے نتائج کا اعلان 24 دسمبر تک کر دیا جائے گا۔

شیڈول کے ساتھ ساتھ الیکشن کمیشن نے تمام حکام کو انتخابی ضابطہ اخلاق کی پابندی کی ہدایت کردی۔ای سی پی نے کہا کہ وفاقی اور صوبائی حکومتوں کے عہدیدار الیکشن پر اثر انداز ہونے سے گریز کریں۔