پاکستان کی معروف اداکارہ و ماڈل ایمن خان کا کہنا ہے کہ اسکرین پر آنے کے لئے انہیں ابھی تھوڑا وقت چاہیے کیونکہ بیٹی بہت چھوٹی ہے اور میرے لیے اپنی فیملی سے بڑھ کر کچھ نہیں ہے-
باغی ٹی وی :اداکارہ و ماڈل ایمن خان شوہر اور اداکار منیب بٹ کے ہمراہ اداکارہ و میزبان حنا الطاف اور آغا علی کے شو کپل شو میں جلوہ گر ہوئے جہاں انہوں نے میزبان جوڑی کے سوالوں کا جواب دیتے ہوئے ڈراموں میں کام نہ کرنے کی وجوہات بتائیں۔
ایمن خان نے کہا کہ جہاں تک اداکاری کا تعلق ہے تو مجھے لگتا ہے کہ میں نے ایک ساتھ بہت زیادہ کام کرلیا تھااور 2 سے 3 سال تک میں نے دن رات کام کیا۔
انہوں نے کہا کہ اب میں اپنے وقت کو انجوائے کررہی ہوں اور جان رہی ہوں کہ زندگی کیا ہے، ورنہ ہوتا یہ تھا کہ صبح اٹھے، میک اپ کروایا اور شوٹ پر چلے گئے پھر واپس آئے اور منہ دھو کر سوگئے۔
ایمن خان نے کہا کہ ہم بطور چائلڈ اسٹار بچپن سے کام کررہے ہیں، ہماری عمر کی لڑکیاں جب اچھے اچھے بیگ لے کر یونیورسٹی جارہی ہوتی تھیں ہم اس وقت بھی شوٹ پر جارہے ہوتے تھے-
انہوں نے کہا کہ ہم نے دیکھا ہی نہیں زندگی کیا ہے اب جب تھوڑا وقت ملا ہے تو میں اب زندگی کو انجوائے کرنا چاہتی ہوں کیونکہ کام تو تھوڑا بہت چلتا رہتا ہے۔
ڈراموں میں واپسی سے متعلق ایمن خان نے کہا کہ مجھے ابھی تھوڑا وقت چاہیے کیونکہ بیٹی بہت چھوٹی ہے اور میرے لیے اپنی فیملی سے بڑھ کر کچھ نہیں ہے-
