میری آنکھوں کے سمندر میں یہ ایسا کیا ہے
جو بھی ڈوبے وہ بتاتا نہیں ہوتا کیا ہے
رخسانہ سحر
آغا نیاز مگسی
۔۔۔۔۔۔۔۔۔۔۔۔۔۔۔۔۔۔۔۔۔۔۔
اردو کی معروف ادیبہ، شاعرہ اور کالم نگار رخسانہ سحر صاحبہ 12 جولائی 1974 میں ساہیوال پنجاب(پاکستان)میں پیدا ہوئیں۔ ان کا اصل نام رخسانہ شفیق ہے ۔ ان کی اب تک 3 کتابیں شائع ہو چکی ہیں جن میں 2 شعری مجموعے ” ہر پل میرے ساتھ ہو تم” اور ” میں تمہیں جیت لائوں گی” اس کے علاوہ ان کی ایک تصنیف ” پھلوں اور سبزیوں سے علاج ” شائع ہوئی ہے۔ رخسانہ سحر صاحبہ اس وقت اسلام آباد میں رہائش پذیر ہیں۔
غزل
۔۔۔۔۔۔۔۔۔ ۔۔۔۔۔۔
میری آنکھوں کے سمندر میں یہ ایسا کیا ہے
جو بھی ڈوبے وہ بتاتا نہیں ہوتا کیا ہے
آج پھر دیر تلک تیرے خیالوں میں رہی
"رحم اے گردش دوراں یہ تماشا کیا ہے”
روبرو بیٹھ کے وہ شخص نہ جانے مجھ سے
اپنی آنکھیں جو جھکاتا ہے چھپاتا کیا ہے
چھین لیتا ہے بچھڑ کر تو مرے ہوش و حواس
یاد آکر تو مجھے ہوش میں لاتا کیا ہے
زندگی جیسے بھی گزری ہے گزاری ہے سحر
اِس نے پوچھا بھی نہیں میرا تقاضا کیا ہے
رخسانہ سحر
