اسلام آباد: الیکشن کمیشن نے نامزد وزیر اعلیٰ خیبر پختونخوا علی امین گنڈاپور کی کامیابی کا نوٹیفکیشن جاری کر دیا گیا۔
باغی ٹی وی : الیکشن کمیشن نے پاکستان تحریک انصاف( پی ٹی آئی) رہنما علی امین گنڈا پور پی کے 113 ڈیرہ اسماعیل خان سے کامیابی کا نوٹیفکیشن جاری کر دیا ہے۔
قبل ازیں پاکستان تحریک انصاف کے نامزد وزیراعلی خیبر پختونخواہ علی امین گنڈاپور کی زیرصدارت خیبرپختونخوا اسمبلی کے آزاد ارکان کا اجلاس ہوا آزاد حیثیت میں جیتنے والے دو نومنتخب ارکان فضل حق اور لائق محمد نے پی ٹی آئی میں شمولیت کا اعلان کیا، اپر کوہستان سے آزاد نو منتخب ایم پی اے فضل حق اور مانسہرہ (تورغر) سے آزاد ایم پی اے لائق محمد خان نے تحریک انصاف میں شمولیت اختیار کی ہے۔
اجلاس میں شامل تمام آزاد ارکان نے وزارت اعلیٰ کیلئے علی امین گنڈاپور پر بھرپور اعتماد کا اظہار کیا کیا اور دونوں منتخب آزاد ارکان کی وزارت اعلیٰ کیلئے علی امین گنڈاپور کی حمایت کی یقین دہانی کرائی ہے، اس موقع پر علی امین گنڈاپور نے پارٹی میں نئے شامل ہونے والے آزاد ایم پی ایز کو پی ٹی آئی میں شمولیت پر مبارکباد دی اور ان کا خیر مقدم کیا۔
علاوہ ازیں علی امین گنڈا پور کی صدارت پارلیمانی پارٹی کا اجلاس ہوا جس میں ہزارہ اور مالاکنڈ ڈویژن کے رہنماؤں نے پی ٹی آئی پی سے مذاکرات پر تحفظات کا اظہار کیا اجلاس میں کئی ارکان اسمبلی نے پی ٹی آئی پی میں ضم ہونے کی مخالفت کی اور مؤقف اختیار کیا کہ حکومت سازی کیلئے پرویزخٹک اورمحمود خان کی پارٹی کاسہارا لینا مناسب نہیں،اجلاس میں صوبے میں حکومت سازی کے امور پر گفتگو کی گئی اور 10 روز میں حکومت سازی کے امور طے کرنے پر زور دیا گیا جبکہ اراکین اسمبلی کو پشاور میں ہی رہنے کی ہدایت کی گئی ہے۔
گزشتہ روز خبر سامنے آئی تھی کہ پی ٹی آئی پی سے مذاکرات کامیاب ہو چکے ہیں اورمعاہدے کے تحت ہی پرویزخٹک نے پارٹی چیئرمین شپ اور بنیادی رکنیت سے استعفیٰ دیا جس کے بعد پی ٹی آئی پارلیمنٹیرینز کی چیئرمین شپ کا عہدہ پی ٹی آئی کو ملے گا ۔
