وزیراعلیٰ خیبر پختونخوا علی امین گنڈاپور عمران خان سے ملاقات کی اجازت کے لیے سپریم کورٹ پہنچ گئے۔
وزیراعلیٰ خیبر پختونخوا علی امین گنڈا پور عمران خان سے ملاقات کی اجازت کے لیے جسٹس منصور علی شاہ کی عدالت میں پیش ہوئے ،جسٹس منصور علی شاہ نے کہا کہ چیف جسٹس یحییٰ آفریدی لاہور میں ہیں لہٰذا ان سے رجوع کریں، لطیف کھوسہ اور ایڈووکیٹ جنرل خیبر پختونخوا شاہ فیصل بھی عدالت میں پیش ہوئے،لطیف کھوسہ نے کہا کہ ایک ارجنٹ مسئلہ درپیش ہے ، خیبرپختونخوا اسمبلی کا بجٹ سیشن چل رہاہے ، بانی پی ٹی آئی سے ملاقات کی درخواست ارجنٹ سنی جائے،جسٹس منصور علی شاہ نے کہا کہ جوڈیشل سائیڈ پر ہم کچھ نہیں کر سکتے، چیف جسٹس یحییٰ آفریدی یا رجسٹرار سپریم کورٹ سے رجوع کریں ،یہی بہترین طریقہ ہے آپ کا وقت بچے گا،
آپ نے غلط دروازہ کھٹکھٹایا ہے،چیف جسٹس یحییٰ آفرید ی پریکٹس پروسیجر کمیٹی کے چیئرمین ہیں ،
وزیراعلیٰ خیبر پختونخوا نے کہا کہ بجٹ منظوری کا پراسس اسمبلی میں چل رہا ہے،پارٹی سربراہ کا ایک ویژن ہوتا ہے، ہماری بار بار درخواست کے باوجود بانی سے ملاقات نہیں کرائی گئی،تحریک انصاف کی بجٹ کمیٹی بانی پی ٹی آئی سے ملاقات کرے گی،بانی پی ٹی آئی نے سپریم کورٹ کو خط بھی لکھا تھا، خط پر چیف جسٹس یحییٰ آفریدی نے بڑے اچھے ریمارکس دیئے تھے،بانی پی ٹی آئی کے خط پر کوئی عمل نہیں ہوا، جسٹس منصور علی شاہ نے کہا کہ چیف جسٹس یحیی ٰ آفریدی لاہور میں ہیں،چیف جسٹس سے رجوع کریں،جوڈیشل سائیڈ پر ہم کچھ نہیں کر سکتے،بہتر یہ ہے رجسٹرار یا چیف جسٹس سے رجوع کریں ،
بعد ازاں سپریم کورٹ کے باہر میڈیا سے گفتگو کرتے ہوئے علی امین گنڈا پور نے کہا کہ بانی پی ٹی آئی سے ملاقات کےلیے پچھلے کئی دنوں سے کوشش کررہے تھے، عمران خان کی ہدایت پر آج سپریم کورٹ آیا ہوں،عمران خان نے سپریم کورٹ کو خط بھی لکھا تھا، خط کے ساتھ بانی پی ٹی آئی نے ثبوت بھی لگائے تھے، خط پر چیف جسٹس یحییٰ آفریدی نے بڑے اچھے ریمارکس دیے تھے مگر خط پر کوئی عمل نہیں ہوا،ہماری باربار کی درخواست کے باوجود بانی پی ٹی آئی سے ملاقات نہیں کرائی گئی، ہمارے خلاف یہ ایک سازش ہو رہی ہے، بجٹ منظوری کا عمل اسمبلی میں چل رہا ہے، تحریک انصاف کی بجٹ کمیٹی بانی پی ٹی آئی سے ملاقات کرے گی۔
