گلوکارعلی نور روبہ صحت ، اہم اعلان کرنے کا عندیہ دے دیا ، مداحوں میں خوشی کی لہر دوڑ گئی

اسلام آباد: پاکستان کے معروف گلوکار علی نور کی طبیعت سنبھل گئی جس پر علی نور نے اپنے مداحوں کا شکریہ ادا کرتے ہوئے کہا کہ میں‌ان سب کا مشکور ہوں جن لوگوں نے میری صحت یابی کے لیے دعائیں کیں، گلوکار علی نوز جگر کے سنگین عارضے میں مبتلا تھے،

علی نور کے آفیشل انسٹا گرام اکاؤنٹ اور نوری بینڈ کے آفیشل پیج سے اپیل کی گئی تھی کہ علی نور کو جگر کے ٹرانسپلانٹ کے لیے ڈونر درکا ر ہے ، اس اپیل کے بعد مداح پریشان ہوگئے تھے۔پوسٹ میں کہا گیا تھا کہ علی نور کے پاس صرف اڑتالیس گھنٹے باقی ہیں اور ان کا کوئی بھی دوست ، رشتے دار، سسرالی رشتے دار جس کی عمر 18 سے 45 سال کے درمیان اور بلڈ گروپ بی پازیٹو، بی نیگیٹو، او پازیٹو یا او نیگیٹو ہو وہ اپنا جگر عطیہ کرسکتا ہے۔

گلوکار علی نور اسلام آباد کے ایک ہسپتال میں‌زیر علاج رہے ،جہاں ڈاکٹرز نے اُن کی طبیعت کو خطرے سے باہر قرار دیتے ہوئے بتایا کہ ابتدائی ٹیسٹ میں یہ بات سامنے آئی کہ علی نور کو ہیپاٹائٹس اے کا عارضہ لاحق ہے۔پاکستانی گلوکار نے لکھا کہ وہ جلد اہم اعلان کریں گے کیونکہ وہ کافی عرصے سے ایک پروجیکٹ پر کام کررہے تھے جس کا اعلان طبیعت ناسازی کے باعث ملتوی کرنا پڑا۔

Comments