پاکستان شوبز انڈسٹری کے عالمی شہرت یافتہ گلوکار اور اداکار علی ظفر نے مقبول ترین بلوچی گیت ’لیلا او لیلا‘ کی کامیابی کے بعد سندھی گیت ’ الّے ‘ کا پرومو جاری کردیا۔
باغی ٹی وی :بلوچستان سے تعلق رکھنے والی کم عمر 13 سالہ گلوکارہ عروج فاطمہ نے گزشتہ سال علی ظفر کے ساتھ گلوکاری کی خواہش کا اظہار کیا تھا جس پر گلوکار نے مداح کی خواہش کا خیر مقدم کرتے ہوئے عروج کے ساتھ بلوچی گیت ’لیلا او لیلا‘ بنایا تھا۔
علی ظفر اور عروج فاطمہ کے اس گیت کو شائقین کی جانب سے اتنا پسند کیا گیا کہ گیت نے مقبولیت کے ریکارڈ اپنے نام کرلئے یوٹیوب پر اب تک اس ویڈیو کو 2 کروڑ 73 لاکھ 59 ہزار 3سو سے زائد بار دیکھا جا چکا ہے اسی مقبولیت کے پیش نظر گلوکار نے اپنی مداح کے ساتھ ایک اور گیت کا پرومو جاری کردیا ہے۔
علی ظفر نے اپنے انسٹا گرام اکاؤنٹ پر جاری کردہ پرومو میں سندھی روایتی رقص کرتے نظر آرہے ہیں۔
ویڈیو کے ساتھ کیپشن میں انہوں نے لکھا کہ ’لیلا او لیلا‘ کی کامیابی کے بعد اس بار میں اور فاطمہ ’الّے‘ گیت کے ساتھ واپس آرہے ہیں جوکہ رواں ماہ 26 نومبر کو ریلیز کیا جائے گا۔
گلوکار نے لکھا کہ اس ویڈیو میں ہپ ہاپ ریپر عابد بروہی بھی نظر آئیں گے۔ ساتھ ہی انہوں نے جیے سندھ، جیے پاکستان اور اجرک کا ہیش ٹیگ بھی استعمال کیا۔
