الجزائر کے آرمی چیف جنرل احمد قاید صالح چل بسے

الجزائر کے آرمی چیف جنرل احمد قاید صالح چل بسے

باغی ٹی وی رپورٹ الجزائر کے آرمی چیف جنرل احمد قاید صالح سوموار کے روز اچانک حرکت قلب بند ہونے سے انتقال کر گئے ہیں۔ان کی عمر 79 سال تھی۔

انھوں نے چار روز قبل ہی الجزائر کے نئے منتخب صدر عبدالمجید تبون کی حلف برداری کی تقریب میں شرکت کی تھی۔ نئے صدر نے اپنے عہدے کا حلف اٹھانے کے فوری بعد جنرل احمد قاید صالح کو ملک کا سب سے اعلیٰ اعزاز ’آرڈر آف میرٹ‘ دیا تھا۔

ان کی وفات پر صدر عبدالمجید تبون نے ملک میں تین دن کے سوگ کا اعلان کیا ہے اور برّی فوج کے سربراہ جنرل سعید شنقريحہ کو مسلح افواج کا قائم مقام چیف آف اسٹاف مقرر کیا ہے۔

مرحوم آرمی چیف نے الجزائر کے مطلق العنان صدر عبدالعزیز بوتفلیقہ کی اس سال اپریل میں عوامی احتجاجی مظاہروں کے بعد معزولی میں اہم کردار ادا کیا تھا۔سابق صدر کے خلاف فروری سے احتجاجی مظاہرے جاری تھے۔
واضح رہے کہ کچھ عرصہ پہلے الجزائر میں انتخابات کا اعلان کیا گیا . عبوری صدر عبدالقادر بن صالح نے کہا ہے کہ ملک میں صدارتی انتخابات 12 دسمبر کو ہونگے50 رکنی انتخابی کمیشن کا تعین کیا گیاجس کا صدر سابق وزیر قانون محمد شرافی کو بنایا گیا۔