ایمیزون کے مالک کی سابقہ اہلیہ کا خطیر رقم کا عطیہ

ایمیزون کے مالک جیف بیزوس کی سابقہ اہلیہ میکنزی اسکاٹ نے فلاحی کاموں کیلئے خطیر رقم کا عطیہ دے دیا۔

باغی ٹی وی : غیر ملکی خبر رساں ادارے ووکس کی رپورٹ کے مطابق دنیا کی تیسری امیر ترین خاتون میکنزی اسکاٹ نے فلاحی کاموں کیلئے 2 ارب 70 کروڑ ڈالر کی خطیر رقم فلاحی کاموں کیلئے عطیہ کی ہے۔

میکنزی اسکاٹ کی عطیہ کی گئی رقم تعلیم سمیت دیگر شعبوں میں خرچ کی جائے گی یہ رقم 286 فلاحی اداروں کے ذریعے فلاحی کاموں پر لگائی جائے گی۔

واضح رہے کہ اس سے قبل میکنزی نے نسلی امتیاز کے خاتمے، صحت عامہ اور موسمیاتی تبدیلیوں کی مد میں ایک اعشاریہ 7 بلین ڈالر کی خطیر رقم عطیہ بھی کی تھی۔

یاد رہے کہ کیلیفورنیا سے تعلق رکھنے والی51 سالہ میکنزی کی ایمیزون کے بانی جیف بیزوس سے 1993 میں ملاقات ہوئی، اس شادی سے ان کے چار بچے ہیں۔ ان کی شادی 2019 میں علیحدگی پر ختم ہوئی اور میکنزی اسکاٹ نے رواں برس ہی دوسری شادی کی ہے میکنزی اکاؤنٹنٹ کی حیثیت سے ایمیزون کے ابتدائی ملازمین میں سے ایک تھیں۔

انہوں نے دو کتابیں بھی لکھی ہیں جن کو ناقدین سے کافی پزیرائی ملی اور انھوں نے ناول نگار پُلٹزر انعام یافتہ مصنف ٹونی موریسن سے ٹریننگ بھی حاصل کی ہے جنہوں نے کہا ہے کہ میکنزی ان کی سب سے اچھی شاگردوں میں سے ایک ہیں۔