عامر لیاقت حسین کی والدین کے پہلو میں تدفین کر دی گئی

کراچی :معروف اینکر عامر لیاقت حسین کو عبداللہ شاہ غازی کے مزارکے احاطے میں سپردخاک کردیا گیا۔عامر لیاقت کی نماز جنازہ ان کے صاحبزادے احمد عامر نے پڑھائی۔بعد ازاں عامر لیاقت کو عبداللہ شاہ غازی کے مزار کے احاطے میں سپردخاک کیا گیا۔

ڈاکٹرعامر لیاقت حسین کی نماز جنازہ ادا کردی گئی ہے،تفصیلات کے مطابق معروف مذہبی اسکالر اور ایم این اے ڈاکٹرعامر لیاقت حسین کی نماز جنازہ میں پی ٹی آئی اراکین اسمبلی خرم شیرزمان ،علی جی جی اور شہزاد قریشی نے شرکت کی۔

واضح رہے کہ معروف سیاست دان اور مذہبی اسکالر اور ایم این اے عامر لیاقت حسین جمعرات 9 جون کو کراچی میں انتقال کرگئے۔ عامر لیاقت حسین کو تشویشناک حالت میں اسپتال منتقل کیا گیا تھا جہاں ڈاکٹرز نے معائنے کے بعد انتقال کی تصدیق کی، جبکہ ان کے ڈرائیور جاوید نے پہلے ہی موت کی تصدیق کردی تھی۔

ڈاکٹرز کا کہنا ہے کہ عامر لیاقت حسین کو جب اسپتال لایا گیا تو وہ انتقال کر چکے تھے۔ڈرائیور جاوید کا کہنا تھا کہ گھر میں عامر لیاقت کے کمرے کا دروازہ کھٹکھٹایا گیا تاہم اندر سے کوئی جواب موصول نہیں ہوا۔

عامر لیاقت حسین اپنے آبائی گھر خداداد کالونی میں موجود تھے، گھر پر موجود ملازمین دروازہ کھول کر اندر گئے تو وہ بے ہوش حالت میں بستر پر موجود تھےجس کے فوری بعد انہیں اسپتال منتقل کیا گیا۔