اقلتیوں کے تحفظ میں ریاست ناکام ہوگئی ہے، بلاول بھٹو

چیئرمین پی پی پی بلاول بھٹو زرداری کی طرف سے رحیم یار خان میں ہندو برادری کے مندر میں تخریب کاری کرنے والے عناصر کے عمل کی مذمت کی گئی ہے، مذہبی رواداری ہمارے خطے کی روایتوں کا حصہ ہے، عدم برداشت کے مظاہرے ہماری تہذیب کے منافی ہیں، اقلیتوں کا تحفظ ریاست کی بنیادی ذمہ داری ہے، جب انتہاپسند مندر پر حملے کررہے تھے تو انتظامیہ کہیں نظر نہیں آئی، ہندو برادری کے افراد کو اپنی عبادت گاہ کی توہین سے نہ صرف ٹھیس پہنچی بلکہ عدم تحفظ کے احساس میں بھی اضافہ ہوا ہے، اگر ہم ملک میں آباد چند فیصد اقلیتی برادری کو تحفظ کا احساس نہیں دے سکتے تو یہ اکثریتی آبادی کے لئے ایک لمحہ فکریہ ہے، انتہاپسندوں نے بھونگ میں مندر کو نقصان پہنچا کر قومی پرچم میں اقلیتوں کی نمائندگی کرتے سفید حصے کی بھی توہین کی ہے، انتظامیہ وسیب میں ہوئے دل دہلا دینے والے افسوس ناک سانحے کے ذمہ داران کو کٹہرے میں لاکر انہیں عبرت کا نشان بنائے.