ڈاکٹرغلام مصطفی بڈانی
بہاولپور (باغی ٹی وی، نامہ نگار حبیب خان) احمد پور شرقیہ کے علاقے ڈیرہ نواب صاحب میں واقع حیات کلینک پر دو مسلح ڈاکوؤں نے ہلہ بول کر ڈاکٹر یاسر حیات قریشی سے 65 ہزار روپے نقدی، شناختی کارڈ، ڈرائیونگ لائسنس، دو اے ٹی ایم کارڈز اور پی ایم ڈی سی رجسٹریشن کارڈ چھین لیے۔ واقعے کی سی سی ٹی وی فوٹیج حاصل کر لی گئی ہے جس کی مدد سے ملزمان کی شناخت کی جا رہی ہے۔
واردات پیر کی شب 9 بج کر 10 منٹ پر پیش آئی جب دو نامعلوم افراد بغیر نمبر پلیٹ چائنا موٹر سائیکل پر کلینک کے احاطے میں داخل ہوئے۔ دونوں ڈاکوؤں نے داخل ہوتے ہی اسلحہ تان کر ڈاکٹر کو یرغمال بنایا اور لوٹ مار کے بعد ہوائی فائرنگ کے بغیر موقع سے فرار ہو گئے۔
پولیس نے متاثرہ ڈاکٹر کی مدعیت میں مقدمہ درج کر کے تفتیش کا آغاز کر دیا ہے۔ پولیس حکام کا کہنا ہے کہ ملزمان کی شناخت اور گرفتاری کے لیے سی سی ٹی وی فوٹیج کا بغور جائزہ لیا جا رہا ہے اور جلد پیش رفت متوقع ہے۔
دوسری جانب اہلِ علاقہ نے انتظامیہ سے مطالبہ کیا ہے کہ سیکیورٹی کے انتظامات بہتر بنائے جائیں، خاص طور پر کلینکس، میڈیکل مراکز اور کاروباری اداروں کے گرد پولیس گشت کو مؤثر بنایا جائے تاکہ شہری عدم تحفظ کا شکار نہ ہوں۔
