تحصیل بھیرہ کے علاقہ میلووال میں بااثر زمیندار کی اپنی گھریلو ملازمہ سے زیادتی

بھیرہ تحصیل بھیرہ کے علاقہ میلووال میں بااثر زمیندار کی اپنی گھریلو ملازمہ سے مسلسل چھ ماہ تک زیادتی کر کے اسے حاملہ کرنے کے واقعہ کی ہر مکتبہ فکر نے شدید مذمت کرتے ہوئے حکومت سے مطالبہ کیا ہے کہ وہ ملزم کو فوری گرفتار کر کے اسے کیفر کردار تک پہنچائے۔ 16 سالہ مسمات (ج) کے بھائی رکشہ ڈرائیور شاہد علی نے پولیس کو بتایا کہ اس کی بہن میلووال کے بااثر زمیندار رب نواز قریشی نمبر دار کے پاس گھریلو ملازمہ کا کام کرتی تھی جو اسے مسلسل زیادتی کا نشانہ بناتا رہا جس سے وہ حاملہ ہو گئی مگر درندہ صفت ملزم زیادتی سے باز نہ آیاتو مسمات (ج) کو بلیڈنگ شروع ہو گئی اور حالت غیر ہونے پر وہ اسے گورنمنٹ مولا بخش ہسپتال سرگودھا لے آیا جہاں اس کی جان بچانے کی خاطر ابارشن کی گئی۔ ہسپتال ذرائع کے مطابق مسمات (ج) کی حالت ابھی تک نہیں سنبھل سکی۔ جبکہ زمیندار کے لواحقین نے سیاسی اثر و رسوخ استعمال کر مسمات (ج) کے لواحقین کو صلح پر مجبور کرنا شروع کر دیا ہے۔ جماعت اسلامی یوتھ تحصیل بھیرہ کے صدر ملک امجد کلیم اعوان و دیگر نے گھریلو کام کاج کے لیے رکھی گئی ملازمہ سے زیادتی کے دلخراش واقعے کی شدید مذمت کرتے ہوئے بااثر زمیندار کی فوری گرفتاری اور شرعی سزا کا مطالبہ کیا ہے۔