دفتر خارجہ کے ترجمان زاہد حفیظ نے کہا ہے کہ بھارت کسی صورت داسو دہشت گرد حملے میں ملوث ہونے کی تردید نہیں کر سکتا-
باغی ٹی وی : تفصیلات کے مطابق اپنے ایک بیان میں ترجمان دفتر خارجہ کا کہنا تھا کہ بھارتی وزارت خارجہ کے مضحکہ خیز بیان کو مسترد کرتے ہیں، بھارت کسی صورت داسو دہشت گرد حملے میں ملوث ہونے کی تردید نہیں کر سکتا، پاکستان نے بھارت کے دہشت گردی میں ملوث ہونے کے ثبوت دیئے۔
ترجمان دفتر خارجہ نے کہا کہ بھارت کے جھوٹے بیانیہ اور ہلکی پھلکی تردید سے حقائق تبدیل نہیں ہوں گے، بھارت ریاستی دہشت گردی کا بطور پالیسی استعمال ترک کر دے پاکستان علاقائی امن و سلامتی کے درپے بھارتی سازشوں کی مخالفت کرتا رہے گا۔
زاہد حفیظ نے کہا کہ گزشتہ سال عالمی برادری کو تفصیلی ڈوزیئر پیش کر چکے ہیں ،لاہور حملے میں بھارت کے ملوث ہونے کے ثبوت بھی پیش کیے،بھارت کی پاکستان مخالف ریاستی دہشت گردی کا ناقابل تردید چہرہ کلبھوشن یادیو ہے۔
