انڈیا صرف ایک ہی صورت میں ترقی کرسکتا ہے کہ اس کا نام تبدیل کر دیا جائے کنگنا رناوت

بالی ووڈ اداکارہ کنگنا رناوت نے انڈیا کا نام تبدیل کرکے بھارت رکھنے کا مطالبہ کردیا۔

باغی ٹی وی : بالی ووڈ کی متنازعہ اداکارہ کنگنا رناوت آئے روز اپنے بیانات یا پھر سوشل میڈیا پر پوسٹ کے ذریعے تنازعہ کھڑا کرکے تنقید کا نشانہ تو بنتی ہی ہیں ساتھ میں سب کی توجہ بھی حاصل کرلیتی ہیں-

بالی ووڈ کوئین کا ابھی پاسپورٹ کی تجدید کا تنازعہ ختم نہیں ہوا کہ انہوں نے ’انڈیا‘ کے نام کو لے کر نئی پوسٹ شیئر کردی جس سے نئی بحث چھڑگئی ہے۔

بھارتی حکام نے کنگنا رناوت کے پاسپورٹ کی تجدید سے انکار کیوں کیا؟

اپنے تصدیق شدہ انسٹاگرام پر اداکارہ کنگنا رناوت نے ایک اسٹوری شیئر کی جس میں انہوں نے لکھا ’بھارت صرف ایک ہی صورت میں ترقی کرسکتا ہے جب اس کی جڑیں قدیم روحانیت اور حکمت سے جڑی ہوں جو ہماری تہذیب کی اصل روح ہے‘۔

اداکارہ کا کہنا تھا کہ دنیا ہمیں دیکھے گی اور ہم دنیا میں عالمی رہنما کے طور پر ابھریں گے لیکن اس کے لیے ہمیں اس غلامانہ نام ’انڈیا‘ سے چھٹکارا حاصل کرنا ہوگا۔

اداکارہ نے کہا کہ کیا ہم انگریزوں کے اس غلامانہ نام ’انڈیا‘ کو دوبارہ بھارت میں تبدیل کرسکتے ہیں، دراصل یہ نام ’انڈیا‘ ہمیں انگریزوں نے دیا تھا جس کا کوئی مطلب نہیں-